Nainteresado ko pag-utingkay sa martial arts record sa Amerikanong si Cris Algieri, ang challenger ni Manny Pacquiao alang sa WBO welterweight title.
Nganong mibiya man siya sa kickboxing, unsay rason nganong boksing man maoy iyang gipili? Si Christopher Mark Algieri, sukad pagkabata mahiligon na sa full-contact sport.
Nagtungha siya sa Stony Brook University ug didto nasulod siya sa Full-Contact Kickboxing inabagan nila ni Tim “Bring the Pain” Lane ug Keith Trimble sa Bellmore Kickboxing Academy.
Wa siya’y pilde sa amateur kickboxing maong misuway siya pagtaak sa US Kickboxing Association Northeast Championship. Una niyang nakuha ang WKA Super Welterweight World Championship batok sa Canadian National Champion, Brad Fowler via 8th round KO.
Sukad niadto, tanang away ni Algieri sa ring sa tibuok kalibotan pulos siya midaog, apil sa iyang mga nakuhang bakus mao ang ISKA World Welterweight Championship gikan kang Scott Mukaddam.
* * *
Sa laktod pagkasulti, migawas si Algieri sa iyang kickboxing career nga undefeated ug undisputed world champion sa duha ka weight divisions ug duha ka managlahing organisasyon, ang WKA ug ISKA sa record nga 20-0.
Gipul-an na siya sa kickboxing mao nga nakadesider siyang motipas sa boksing. Maayo usab nga wrestler si Algieri apan wa siya motaak sa mixed-martial arts kay ang iyang damgo gikan sa pagkabata ang mamahimong world boxing champion.
Di tungod sa kwarta, dili tungod sa panginahanglan, o dungog sa nasud, kun dili personal lang gyud nga katagbawan.
* * *
Hinuon, wala mag-inusara si Algieri sa mga professional boxers nga kanhi kickboxers, pwerteng daghana nila. Usa na niini ang Ukrainian WBC heavyweight champion Vitali Klitchko nga kanhi ISKA champion, ang Mandauehanon nga si Mercito Gesta nga kanhi kickboxer ug mitaak usab sa boksing.
Sa pagka karon, si Algieri nagkupot na usab og 20-0 rekord nga may 8-knockouts sa boksing. Sa kinatibuk-an, 40-0 na iyang professional fighting record apil ang sa kickboxing.
Si Pacquiao pa unya ang maka-virgin kang Algieri aron patilawon sa una niining kapildihan isip usa ka professional boxer.
Ang 5’10 challenger nga mao karo’y nagkupot sa WBO light welterweight human modaog batok ni Russian Ruslan Provodnikov nagtuo nga mas utokan siyang moaway itandi kang Pacquiao.
* * *
PAGTULON-AN: “The true science of martial arts means practicing them in such a way that they will be useful at any time, and to teach them in such a way that they will be useful in all things.”
–Shimen Miyamoto Musashi