CEBU, Philippines - Nakita sa beteranong sports analyst nga si Quinito Henson nga wala nay gana ug kagutom si kanhi Pinoy boxing champion Nonito Donaire nga mudaog rasun sa iyang labing uwahing kapildehan.
Si Donaire nakahiagum sa labing una niyang knockout nga kapildehan sa mga kamot ni Nicholas Walters niadtong miaging buwan atol sa ilang sangka alang sa WBA featherweight title didto sa California.
Si Henson way pagduha-duha nga midetalye sa iyang nadunggan nga wala na kaayo mipakita og kadasig sa training sa wala pa ang sangka nila sa Jamaican knockout artist.
“Ang balita ko, Nonito did not train hard enough for the Walters fight, I think he took him lightly,” matud pa ni Henson.''Pag nag-hahard training siya, tatlong araw magre-rest. Tapos hard training, tatlong araw magre-rest. Parang hindi na nakikita ang gutom.''
Usa sa rasun nga gitudlo ni Henson mao ang pagsaka sa gisikaton ni Donaire kinsa giisip nga ikaduha ni Manny Pacquiao isip labing popular nga boxer sa nasud.
Dugang pa ni Henson nga atol sa sparring, si Donaire maglikay nga maigo ang iyang nawung rasun nga dili kaayo kini mubanat sa sparring sessions. (LPM gikan sa ABS-CBN News)(BANAT NEWS)