CEBU, Philippines – Nalambigit karon sa "quadruple tie" ang Petracorta-Rollway Brokers, Ynah Brokers, MCWD ug ang Customs Portmen sa 2-0 nga baraha human sa ilang managlahing kadaogan ning semanaha sa nagpadayon nga 3rd BOC-CIPU Friendship Cup basketball tournament didto sa barangay Tinago gym ning dakbayan.
Gilubong sa Petracorta-Rollway ang Transwise, 99-70 kaniadtong Martes ug gilubong sab sa Ynah Brokers ang CEI, 103-77.
Kaniadtong Miyerkules, gipukan sa MCWD ang Customs Task Force, 88-83, ug midaog ang Customs Portmen batok sa Global Carrier, 90-80.
Nanimpad pa ang MP Brokers kaniadtong Huwebes batok sa Lao Brokers apan wala pa hisayri ang resulta sa maong duwa. Tulo ka players sa Petracorta-Rollway ang mibahug og double figures pinangulohan ni Takloy Moral sa iyang 19 puntos samtang miposa og 20 puntos si Loreto Castillo alang sa Transwise. Ang Ynah sa laing bahin, gipangulohan ni Gerry Singson sa iyang 15 puntos samtang si Armie Marata, ang uyoan ni PBA star Cyrus Baguio, maoy nangu sa kadaugan sa MCWD sa iyang game-high 22 puntos.
Upat sab ka players sa Customs Portmen ang mihagdaw og double digits nga naglakip sa ilang team leader nga si Boodie Monteno sa iyang 10 puntos. (BANAT NEWS)