FESSAP's Ekodjatmiko Sukarso makigkita kang Atty. Estenzo

Karong Agosto 20, molarga padulong sa China ang Dean sa College of Law sa University of Cebu kinsa mao sab ang team manager sa UC basketball teams sa Cebu Schools Athletic Foundation, Inc. (CESAFI).

Si Atty. Estenzo maoy mo-representar sa UC alang sa usa ka international sports assembly ang 8th Asian University Sports Federation (AUSF) didto sa Qingdao, China karong umaabot Sabado, Agosto 23.

Ang maong imbitasyon naggikan kang Ekodjatmiko Sukarso, ang Indonesian nga sakop sa  Universiade secretariat ug gi-email ngadto ni Atty. Estenzo gikan kang Graham Lim, ang national secretariat sa Federation of School Sports Association of the Philippines kun FESSAP nga sakop sa AUSF.

Si Atty. Estenzo motambong sa AUSF General Assembly isip FESSAP First Delegate. Laing duha ka kauban didto sa maong tigum, mao silang Atty. Maria Luz Arzaga-Mendoza isip Second Delegate ug Atty. Leo Luis P. Mendoza, Assistant Legal Team isip Observer.

Wala ihatag ang kinatibuk-ang detalye sa nahisgotang sports meeting apan kalabot kini sa umaabot nga Universiade didto sa South Korea sunod tuig.

CACOY DOCE PARES. Ang Cacoy Doce Pares Headquarters maoy midaog sa overall championship sa bag-o lang natapos nga FMA Festival didto sa City Sports Club sa Ayala Business Park gikan niadtong Agosto 3-9. Usa sa highlights sa maong international tournament nga gisalmotan sa labing menos 70 ka langyaw nga eskrimadors, mao ang 4th Hall of Fame Awards niadtong Agosto 8 nga tuyong gitumong alang sa ika-95 nga kasumaran sa adlaw'ng natawhan ni eskrima Supreme Grand Master ug Cacoy Doce Pares lifetime president nga si Ciriaco "Cacoy" Canete.

Tungod sa maong overall championship, gipahinungdan ni Cacoy og usa ka victory party ang iyang mga sakop didto sa ilang panimalay sa dan C. Padila.

Matud pa ni Cacoy nga ang ika-limang Hall of Fame himoon na sab nila sa 2016 apan adunay world eskrima tournament sunod tuig nga iya sab gihapong itumong sa iyang birthday.

DEPENSA MAOY DAG-ANAN. Miangkon si Gilas Pilipinas coach Chot Reyes nga kung gitas-on maoy hisgotan, wala gyud kita'y dag-anan kung itandi sa ubang mga teams sa umaabot nga FIBA World Cup of Basketball didto sa Spain sugod karong Agosto 30.

Busa aron kuno duna kita'y ikasukol gamay, (dili purohan nga modaog) adto kuno nato bawion sa depensa.

Ambot unsang matanga sa depensa ang nahuna-hunaan ni coach Chot nga sa akong tan-aw, mao bitaw nga maglisod kita'g depensa kay tag-as kaayo ang atong mga kontra. Mura'g iya man lang kining gibali pagsulti unya diay moingon human sa torneyo "mas matangkad kasi sila, mahirap talagang dumepensa."

Kung naghuna-huna kita'g depensa, mao sab kana'y buhaton sa tanang teams nga mosalmot sa FIBA World Cup dili kay kita lang. Atong angkonon  nga mosaler ang atong depensa, unya ang opensa, magsilbi kaha?

Mao kini ang atong atangan. Mabuhay Gilas, Mabuhay Pilipinas!

MISCELLANEOUS. Advance birthday greeting to Micaela "Ellah" Gonzales who turns 11 years old this coming Thursday, August 21. On Saturday, August 23, will be the baptismal of Ernestien Jean Medalle, daughter of Baeng Medalle and niece of Noel Medalle.