Dili pa lang dugay, nahimuot ako sa akong nabasahan sa facebook dihang usa ka comment gikan sa post gikan ni kanhi Philippine Basketball League (PBL) kalabot sa gipakitang duwa ni Paul Lee sa Gilas Pilipinas batok sa Singapore nga nagkanayon "wala namang Paul Lee sa RP Gilas eh" ug akong nasayran nga ang gidala diay niyang ngalan John Paul Dalistan.
Siya sab maoy bayani alang sa Gilas kinsa mitapos sa ilang kampanya sa 5th FIBA Asia Cup isip third placer didto sa Wuhan, China dihang iyang napasulod ang tulo ka free throws, 79-77. Walay kulba nga gipasulod ni Lee (Dalistan) ang iyang tulo ka free throws alang sa 80-79 nga kadaugan sa Gilas.
Makapausab gyud diay sa ngan kung masakop na ang usa ka player sa RP Team ug makaduwa na sa usa ka major international competition.
Gani si Jayson Castro nga maoy atong nailhan gikan pa sa nagduwa siya sa kolehiyo sa Philippine Christian University (PCU) Dolphins ni kanhi coach Ato Tolentino, nausab ang apelyido dihang nagduwa na siya sa 27th FIBA Asia sa miaging tuig didto sa Manila kay ang marka sa iyang jersey "Williams."
Niadtong higayona, abi nako'g nasayop lang gyud pag-imprinta o nasayop lang siya'g sul-ob og jersey nga dili iyaha.
Hangtod nga nagduwa na siya sa PBA og pila ka tuig uban sa Talk and Text Phone Pals hangtod nahimo sab kining Tropang Texters, wala kitay nailhang player nga Jayson Williams. May Williams man tuod apan siya si Kelly Williams nga usa ka Fil-Am apan kini si Jayson Williams, pure Tagalog nga gikan sa Pampanga apan anak siya'g usa ka military serviceman nga black American.
Kini sab si Paul Lee, samtang nagduwa pa siya nga usa sa labing maayong pointguard sa University of the East (UE) Red Warriors, wala gyud kita masayod nga Dalistan diay ang iyang tinuod apelyido.
Hangtod miabot siya ngadto sa PBA ug nagduwa sa Rain or Shine, walay Dalistan nga player ang atong nahibaw-an apan dihang nasakop na siya sa Gilas Pilipinas, didto nakita nga Dalistan diay ang iyang apelyido.
Posible sa iyang passport, Dalistan gyud ang iyang gigamit nga apelyido. Mahimong gigamit pa gihapon ni Castro ang iyang apelyido dinhi sa Pilipinas apan kung madala na siya unya sa Spain karong umaabot Agosto, posible sab nga Williams na ang iyang dad-on nga apelyido.
Walay makabuot ni bisan kinsang tawo dinhi sa kalibotan sa pagpa-usab sa iyang ngan o apelyido kay gitugotan kana sa korte. Daghan na kaayong mga sports personalities nga nagpa-usab sa ilang mga ngan.
Tulo sa mga labing popular kanila mao ang boksidor nga si Mohammad Ali gikan sa ngan nga Cassius Clay, si Kareem Abdul Jabbar sa Los Angeles Lakers gikan sa ngan nga Lew Alcindor ug si Metta World Peace nga kanhi Ron Artest kinsa kataposang nagduwa uban sa New York Knicks.
Duna hinooy wala magpausab sa ilang ngan apan kanunay ang ilang dagnay o "angga" maoy gigamit apan wala sila magtuo nga misamot hinoon kangil-ad paminawon ang ilang angga. Ambot sab nganong ila mang ikauwaw ang ilang tinuod nga ngan ug hapit na lang ilang awayan ang ilang ginikanan nganong mao kanay gingan kanila.