CEBU, Philippines - Ang team Philippines nga naglakip sa Sugbuanong si Glenn Lava, mihakot og walo ka medalya sa 3rd Asian Taekwondo Poomsae Championships didto sa Tashkent, Uzbekistan.
Gibahin-bahin kini ngadto sa duha ka golds, upat ka silvers ug upat sab ka bronzes.
Si Lava uban nilang Jean Pierre Sabido ug Ernesto Guzman, midaog og silver sa recognized poomsae male team event sa over 30 years old category.
Nidaog sab og laing silver si Lava sa freestyle team competition ning higayona, uban nila ni Rani Ortega, Janice Lagman, Jayford Seridon ug Jeordan Dominquez.
Ang bulawan sa Pilipinas nadaog nilang Marvin Gabriel, Dustin ug Rico Mella sa recognized male team under 30 ug ni Jean Pierre Sabido sa individual freestyle.
Ang laing duha ka silvers gitunol nilang Marvin Gabriel ug Juvenile Crisostomo sa freestyle pair ug Jcel Ninobla sa female individual.
Sila si Lagman, Ortega ug Crisostomo midaog sab og bronze sa recognized female team under 30 class, samtang si Jojo Ninobla mitunol og laing bronze pinaagi sa under 50 class. (FREEMAN)