CEBU, Philippines - Nakauna dayon ang defending champion Miami Heat pinangulohan nilang LeBron James ug Dwyane Wade batok sa Charlotte Bobcats pinaagi sa pag-iskor og 99-88 nga kadaugan sa Game-1 sa NBA Playoffs sa Eastern Conference kagahapon didto sa American Airlines Arena sa Miami, Florida.
Naunhan sab sa overall leader San Antonio Spurs ang Dallas Mavericks pinaagi sa pag-iskor og daog, 90-85 sa Game-1 sa Western Conference didto sa AT&T Center sa San Antonio, Texas,
Si LeBron James mibahog og 27 puntos, samtang si Wade miburak og 23 puntos alang sa Heat, kinsa migamit og duha ka mainitong rally. Una, sa first half ug ang ikaduha didto sa nanghinapos nga bahin sa duwa aron mokaging ang Bobcats.
Mao kadto ika-17 ka sunod-sunod nga higayon sa Heat nga mipilde sa Bobcats.
Suwayan sa Heat nga mokuha'g 2-0 nga bentaha sa subli nilang panagsangka sa Bobcats ugmang adlawa.
Si Kemba Walker maoy nangu sa Bobcats sa iyang 20 puntos
Sa laing bahin, sila si Tony Parker ug Tim Duncan maoy migiya sa Spurs aron makaipsot sa kabangis sa Dallas Mavericks.
Naglabaw unta'g 10 puntos ang Dallas, 91-81 sa uwahing bahin sa fourth period, apan tungod sa kaabtik ni Parker ug sa krusyal nga mga puntos ni Duncan, milampos sila pag-ikyas.
Si Duncan maoy nangu sa Spurs sa iyang 27 puntos luyo sa iyang 4 for 5 field shooting.
Sa laing duwa sa playoffs, napilde sa Washington Wizards ang Chicago Bulls, 102-93 didto sa United Center sa Chicago, Illinois.
Si Hilario Nene miiskor og 24 puntos aron pangulohan ang Wizards.
Nakatabang sab og daku sa opensa silang John Wall, Bradley Beal ug Trevor Ariza.
Gipakuratan sab sa Portland TrailBlazers ang Houston Rockets human makaipsot, 122-120 pinaagi sa overtime.
Si LaMarcus Aldridge mihimo'g career-high ingon man playoff ug franchise record 46 puntos aron pangulohan ang TrailBlazers. (BANAT NEWS)