CEBU, Philippines - Mipasalig si Brooklyn Nets center Andray Blatche nga daku siya og matabang sa kalampusan unya sa Smart Gilas Pilipinas sa kampaniya sa mga Pinoy sa 2014 FIBA World Cup sa Spain sa Agosto.
Si Blatche nagkanayon nga isip usa ka NBA player daku ang matampo niya ilabi na nga sangkaon sa Gilas ang mga elite basketball teams nga gilangkuban usab sa mga NBA cagers.
Ang 6-foot-11 nga si Blatche kinsa hapit na mahimong naturalized center sa Gilas hulip ni Marcus Douthit miingon nga nasuheto siya sa mga NBA players nga anaa moduwa sa ubang teams nga sangkaon sa national team sa first round.
Lakip sa mga sangkaon sa Gilas sa first round mao ang mga contenders sama sa Puerto Rico, Senegal ug Argentina nga pulos adunay mga NBA players nga naglakip nila ni JJ Barea sa Puerto Rico, Gorgui Dieng sa Senegal ug Manu Ginobili ug Luis Scola sa Argentina.
“I also know the guys we'll be playing against like Ginobili and Scola of Argentina. I expect to be ready to play in Spain," matud pa ni Blatche sa The Philippine Star.
Sa laing bahin, sa pagkahimo unyang naturalized player ni Blatche, nahukman sa Samahang Basketbol ng Pilipinas nga ibutang sa reserve list si Douthit. (BANAT NEWS)