CEBU, Philippines - Pipila na lang ka adlaw gikan karon, moulbo na ang Kapitan Leking Cup Basketball Tournament.
Mahitabo kini karong Sabado sa alas-3 sa hapon didto sa Poblacion Oriental open court sa Consolacion, Cebu.
Ang mga kategoriya nga kumbatihan sa maong torneyo mao ang mini (15-anyos ug paubos), midget (20-paubos), juniors (21-pataas) ug inter-sitio friendship games.
"The highlight of the event is the inter-sitio goodwill games, which is aimed at fostering camaraderie among our sitio friends while aspiring to win in every game," matud pa ni tournament organizer Paul Alelu Q. Flores, kanhi collegiate standout sa Far Eastern University (FEU) Tamaraws sa panahon nga niduwa pa siya sa UAAP.
Nanghinaut sab si Flores nga sa maong torneyo, makakaplag sila og mga talento nga maoy ipaon sa ilang barangay atol sa tinuig nilang Fiesta Basketball League unya sa bulan sa Oktubre.
Pito ka sitios ang mopakita'g aksiyon sa maong torneyo nga gisuportahan sa tibuok barangay council sa Poblacion Oriental ubos sa liderato ni Brgy. Capt. Melquiades 'Leking' Caylan. Double round robin eliminations ang format sa duwa diin ang top four teams moabante sa crossover semifinals. Ang mga mananaog maoy mag-abot sa finals.
Ang mga duwa pagadumalaon ni sports commissioner Jerome Valle. Abagan siya nilang Jocelyn Valle, Vic Lagahit, ug Jon Haniel Abinales. (BANAT NEWS)