CEBU, Philippines - Miiskor og "upset" ang Cebu Eastern College (CEC) Dragons sa ilang duwa batok sa University of San Carlos (USC) Baby Warriors, 67-57 sa Alaska Basketball Cup Cebu 2014 semifinals ubos sa Under 16 Division niadtong Domingo didto sa SHS-Ateneo de Cebu Lux Oriens gym sa Brgy. Canduman Campus, Mandaue City.
Sa laing duwa, ang University of the Visayas (UV) Baby Lancers midaog sab batok sa SHS-Ateneo de Cebu (SHS-AdC) Magis Eagles, 74-68 pinaagi sa double overtime.
Daang naglabaw ang CEC human sa first period, 24-8 ug nahimo na lang kining 31-23 atol sa halftime.
Misikit ang Baby Warriors sa third period, 38-40, apan wala sila molampos sa ilang gitinguhang kadaugan.
Si Denzel Drazen Sabroso maoy nangu sa CEC sa iyang 14 puntos.
Sa laing bahin, si Orlan Wamar, kinsa maoy bayani sa second overtime, maoy bida sa kadaugan sa UV.
Silang Nino Araw-araw, manghod ni Arc Garbiel Araw-Araw ug Hans Mesina mao sab ang nangu sa Magis Eagles. (BANAT NEWS)