CEBU, Philippines - Napanglantawan ni kanhi lightweight champion Brandon Rios nga makuha pagbalik ni Manny Pacquiao ang WBO welterweight title gikan ni Timothy Bradley sa ilang "rematch" sa Abril 12 didto sa MGM Arena.
Si Rios nga gipilde ni Pacquiao niadtong Nobiyembre didto sa Macau, miingon nga mudaog ang kanhi niya kontra batok ni Bradley pinaagi sa desisyon.
Bisan pa'g maatbangan ni Bradley ang gipaspason ni Pacquiao, apan malupig kini sa sinukliay tungod sa dili matagna nga ataki sa Pambansang Kamao.
"Pacquiao’s one quick fighter. He’s very fast and everything. It’s just his awkwardness. He throws punches from different angles. And sometimes, that blows your mind," matud pa niya sa boxingboss.com.
Midugang si Rios nga si Pacquiao ang angay nga midaog sa unang sangka niini batok ni Bradley niadtong 2012, apan segurado nga bawion kini sa mga hurado sa rematch ilabi na kun sikit gihapon ang away. (BANAT NEWS)