CEBU, Philippines - Mihatag og garbo sa nasud ang Pinoy Mixed Martial Arts (MMA) fighter nga si Mark Eddiva kinsa nahimong labing unang ‘homegrown’ fighter nga mikulit og daog sa Ultimate Fighting Championship (UFC) niadtong miaging gabii didto sa Macau.
Impresibo ang gipakita ni Eddiva kinsa midominar ug mikulata sa Tsino nga si Jumabieke Tuerxun. Si Eddiva dul-an sa tulo ka tuig nga nawala sa eksena sa MMA, apan bangis kining mubalik aron pildehon ang si Tuerxon.
Sa maong kadaugan si Eddiva misaka sa 6-0 record, samtang ang Tsino nakatilaw sa labing una niining pilde sa 18 ka away.
Ang garbo sa Benguet, migamit sa iyang kusug aron pauwanan og patid ug kumo si Tuerxon kinsa naglisud pagamit sa iyang submission game batok sa mas agresibo nga Pinoy fighter.
Si Eddiva usa ka two-time gold medalists sa Southeast Asian Games (SEAG). Sa maong kadaugan, si Eddiva mibutang sa Pilipinas sa mapa sa UFC ug posible nga daghan pang Pinoy fighter ang kuhaon sa maong torneyo. (BANAT PALARO)