CEBU, Philippines - Midawat og tagsa-tagsa nga mga pasidungog gikan sa Philippine Sportswriters Association (PSA) ang mga Cebuano athletes ug personality sa gipahigayung PSA Awards Night niadtong Sabado sa gabii didto sa Centennial Hall sa Manila Hotel.
Numero unong gipasidunggan sa PSA ang Cebu Schools Athletic Foundation. Inc. (CESAFI) tungod sa padayun niining pagpalambo sa sports sa Sugbo. Gidayeg sa PSA ang nahimo sa CESAFI isip usa ka development program sa mga basketball, football ug volleyball talents sa nasud.
"The award is a welcome recognition of the sports officials particularly the school owners, athletic directors, coaches, trainers, and other CESAFI member schools in their tireless efforts to promote and develop the athletic programs of their student-athletes," matud pa ni CESAFI Commissioner Felix Tiukinhoy Jr.
Gawas sa CESAFI, laing gipasidunggan sa PSA mao ang mga Cebuano athletes sama nila ni Smart Gilas center Junemar Fajardo, world boxing champion Donnie Nietes ug billiard master Rubilen Amit.
Gawas ni Nietes, laing mga Pinoy world champions nga midawat og pasidungog gikan sa PSA mao sila si minimumweight world champion Merlito Sabillo ug IBF light flyweight king Johnriel Casimero.
Midawat usab og award ang mga Cebuano jins nga sila si Glenn Lava, Mikaela Calamba, Jocel Ninobla ug Rinna Babanto kinsa mihakot og gold medals sa miaging world taekwondo championships didto sa Indonesia. (BANAT SPORTS)