CEBU, Philippines - Ang mga Kenyan runners ang migawas nga mananaog sa premier division sa Cebu City Marathon kagahapon sa buntag didto sa Cebu IT Park.
Sila si Jackson Chirchir ug Irine Kipchumba mipakita sa ilang kapaspas sa 42k open category.
Si Chirchir maoy labing unang milabang sa finish line sud sa duha ka oras, 27 minutos ug 16 segundos alang sa titulo sa men’s open. Gisundan siya sa iyang mga kababayan nga sila si Julius Kiptalam sa oras nga 2:31:31 ug John Samoei nga mitapos sa lumba sa oras nga 2:32:43.
Sa iyang bahin, si Kipchumba milampos pagdepensa sa iyang korona sa oras nga 3:12:04 batok sa laing Kenyan female runner nga si Susan Jemutai (3:14:03). Si Jennylyn Nobleza maoy Pinay nga nakasud sa top three sa women’s class sa oras nga 3:16:28.
Midaog sa All-Pinoy full marathon mao si Mona Liza Ambasa sa oras nga 3:24:27, gisundan ni Sandi Abahan (3:32:09) ug Mereeis Ramirez (3:44:16) sa ikaduha ug ikatulong dapit.
Ang Cebuano nga si Noel Tillor maoy hari sa men’s class sa oras nga 2:44:43 uban nila ni Paul Zafico (2:48:03) ug Jobert Carolino (2:48:37) nga mikompleto sa top three placers.
Mga Kenyan gihapon ang nangharos sa 21K men’s class nga mao sila si Benjamin Kipkazi (1:09:02), Eliud Kering (1:09:57) ug Isaac Simat (1:11:43).
Midaog sa 21K women’s si Kenyan Jackline Nzivo sa oras nga 1:24:53 batok sa mga local bets nga sila si Mary Joy Tabal (1:126:46) ug Christy Sevilleno-Tutor (1:50:08).
Sila si Arnold Unabia (1:17:07) ug Amale Jopson (1:52:01) maoy midominar sa 21K local division. (BANAT PALARO)