CEBU, Philippines - Ipahigayon na karong adlawa ang final leg sa 2013 Kartzone Superkart Series diha sa Kartzone racetract sa Brgy. Kasambagan, ning siyudad.
Gisibog ang final leg gikan sa iyang orihinal nga iskedyul niadtong Disyembre sa miaging tuig aron pagsimpatiya ngadto sa mga biktima sa bagyong “Yolanda.â€
Sila si Jette Calderon ug Joseph Rojo maoy higpit nga karibal alang sa "Karters of the Year" award. Si Calderon ang nag-unang kontender sa maong award nga mihipos og 283 puntos, samtang si Rojo mipupo’g 261 puntos. Si Vince Rojo kasamtangang mi-okupar sa ikatulo nga adunay 160 puntos.
Bisan pa sa iyang komportabling labaw, si Calderon walay planong mag-inanay batok ni Rojo.
Si Calderon maoy naghari sa unang tulo ka legs, samtang si Rojo mao sab ang nidominar sa ikaupat hangtod sa ikaunom nga legs.
Gawas sa KOY award, si Calderon uban sa laing duha ka riders laraw sab alang sa overall supremacy sa KT expert class. Nag-una sab si Calderon sa KT expert nga adunay 290 puntos.
Si Vince Rojo mao sab ang nag-una sa KT novice class nga miposte’g 265 puntos, gisundan ni Earl Taborada sa iyang 191 puntos.
Si Panpan Reroma maoy nag-una sa KT masters sa iyang 280 puntos, nagsunod si Rej Aleman nga adunay 242 puntos.
Kasamtangan nag-una si Frederick Cortes sa Honda expert division nga mikadlit og 262 puntos, gisundan ni Lord Seno nga miratsada’g 210 puntos.
Sa laing bahin, si Kym Limgenco sa Kartzone naglawig na sa iyang kadaugan sa Honda class nga miarangkada og 284 puntos batok sa nagsunod niya nga si Norris See nga nakakuha lang og 177 puntos.
Silang Jaron Messina ug Liam Sacal maoy magtigi alang sa mini ROK overall title. Sa kasamtangan, si Messina mitigom og 259 puntos, samtang si Sacal nakakuha’g 225 puntos.
Si Seven Aleman mikambiya og 269 puntos alang mangu sa SQ cadet, samtang si Raprap Gutierrez adunay 232 puntos. (BANAT NEWS)