CEBU, Philippines - Usa ka semana human sa lamok-lamok tali sa Alaska Aces ug San Mig Coffee, laing kagubot ang nahitabo sa laing PBA tune-up game diin nalambigit pag-usab ang rookie sa Alaska nga si Calvin Abueva ug veteran forward sa Barako Bull Energy Cola nga si Danny Seigle.
Sa usa ka tune-up game didto sa Gatorade Hoops Center sa Mandaluyong, gi-atake ni Seigle si Abueva pinaagi sa pagduso niya niini ngadto sa suok sa maong gym.
Daling miuwang ang mga teammates sa duha ka players, apan nakita nga naglungot-lungot sa kalagot si Seigle nga gibira palayo ni Abueva.
Ang Barako Bull ang midaog sa maong tune-up game, 104-97. Ang duha ka koponan pulos nangandam alang sa pagbukas sa PBA Governors Cup sa Agosto 14.
Sa pakighinabi sa Spin.ph, si Seigle miingon nga gi-atake niya si Abueva human siya maigo sa siko sa Alaska rookie diin iyang gisabot nga gituyo ni Abueva.
Kahinumduman nga si Abueva usab ang usa sa mga nalambigit sa kagubot tali sa Alaska ug San Mig niadtong miaging semana didto sa San Juan Arena diin gidaro usab siya ni San Mig center Joe Devance human sa iyang hard-foul ngadto ni Alex Mallari. (BANATSPORTS)