CEBU, Philippines - Hayag na ang kahigayonan ni undefeated Yaw-Yan ArDigma Cebu fighter Vaughn 'The Spawn' Donayre nga mahimong kampiyon dihang siya maoy giila nga No. 1 contender alang sa lightweight title sa Universal Reality Combat Championship (URCC).
Mipaduol si Donayre sa iyang damgo nga mahimong URCC champion human siya mirehistro og first round knockout nga kadaugan batok sa taga-Baguio nga si Robet Buminaang sa URCC-Unleashed niadtong Marso 2 didto sa Baguio Convention Center.
Ang 30-anyos nga si Donayre nga usa usab ka blue-belter sa Brazilian Jiu-jitsu ubos sa DEFTAC Cebu, mipakita sa iyang abilidad sa striking ug gipakatug niya si Buminaang pinaagi sa knee strike sa 1:13 sa first round.
"I went there and became the first ever Cebuano to win in Baguio. My opponent was strong and I am so happy that we got the knockout win," matud pa ni Donayre atol sa press conference niadtong Huwebes sa gabii didto sa Yaw-Yan ArDigma Cebu headquarters.
Si Donayre nga nagbitbit og record nga 5-0, gipaabot nga moaway alang sa lightweight title nga gibakante ni Filipino Honorio Banario, kinsa bag-o lang gikoronahan nga One Fighting Championship (ONE FC) featherweight champion.
Sa iyang bahin, gikompirmar ni Yaw-Yan ArDigma Cebu Founder ug CEO Master Benigno 'Ekin R. Caniga Jr. nga moaway si Donayre sa Abril 27 didto sa SMX Convention Center sa Manila batok sa wala pa hinganling kontra.
Gawas ni Donayre, laing giplanohan nga moaway sa maong fight card mao ang Cebu-based British heavyweight fighter nga si Cris Marvyn Thompson-Brooks. (BANAT PALARO)