CEBU, Philippines - Kapin sa 100 shooters kadaghanan gikan sa police force ang magsinukdanay sa ilang katakus sa pinuntingay dihang ang PS/Supt. Patrocinio A. Comendador Jr. Shootfest 2012 nga uloha'g "CPPO PD's Cup" moulbo karong adlawa didto sa Cebu Pistol and Rifle Association (CPRA) Firing Range sa barangay Pusok, Lapu-Lapu City.
Ang tulo ka adlaw nga kompetisyon usa ka International Practical Shooting Confederation (IPSC) Level I sanctioned match.
Gidalit sa Cebu Provincial Police Office uban sa CPRA, International Defensive Pistol Association (IDPA) ug sa Philippine Practical Shooting Association (PPSA), ang shootfest adunay kinatibuk-ang 14 ka stages.
Ang IPSC ug IDPA mokober og lima ka stages sa 104 ug 64 rounds matag usa. Ang nahabiling upat ka Rifle stages adunay 100 ka rounds.
Ang kalihukan dili lang bukas sa mga sakop sa police ug military force, apan lakip usab sa mga sibilyan ug sa mga pribadong indibidwal kinsa buot mosukod sa ilang marksmanship ug shooting proficiency. (BANAT SPORTS)