P43.5 milyong illegal drugs nasamsam: 2 arestado
MANILA, Philippines — Umaabot sa P43.5 milyon ang halaga ng ilegal na droga na nakumpiska ng mga pulisya mula sa mag-live-partner na inaresto sa isinagawang buy-bust operation sa Cubao, Quezon City, kahapon ng madaling araw.
Kinilala ni Quezon City Police District (QCPD) Director PBGEN Remus Medina ang mga suspek na sina Riza Bilbao, 25, walang hanapbuhay, tubong Sultan Kudarat, Mindanao at Alvin Rapinian, 26, tubong Alfonso Castañeda, Nueva Vizcaya, mag-live in partners at kapwa residente ng 46C 16th Ave., Brgy. San Roque, Cubao, Quezon City.
Batay sa ulat ng QCPD, lumilitaw na dakong alas-2:30 ng madaling araw nang isagawa ng mga tauhan ng Station Drug Enforcement Unit (SDEU) ng Cubao Police Stations 7 (PS-7), sa pamumuno ni PltCol. Joseph Euje Almaquer, at Masambong Police Station 2 (PS-2), sa pamumuno ni PLTCOL Imelda Reyes, ang buy-bust operation sa 46 C, 16th Avenue, Brgy. San Roque, Cubao, Quezon City, sa pakikipag-ugnayan sa Philippine Drug Enforcement Agency (PDEA)-RO-National Capital Region (NCR).
Nakatanggap ng tip ang mga awtoridad hinggil sa ilegal na aktibidad ng mga suspek kaya’t ikinasa ang buy-bust na nagresulta sa kanilang pagkakaaresto.
Nakumpiska mula sa mga suspek ang may 1.5 kilo ng shabu na nagkakahalaga ng P10.2 milyon; 85 kilo ng dried marijuana na nagkakahalaga ng P10.2 milyon, 35 kilo ng kush na nagkakahalaga ng P4.9 milyon, 1 kilo ng cocaine na nagkakahalaga ng P5.3 milyon at 7,594 piraso ng ecstasy na nagkakahalaga ng P12.9 milyon, timbangan, isang cellphone at buy-bust money.
Lumilitaw sa kanilang imbestigasyon na ang mga suspek ay gumagamit ng online transactions at online delivery services sa kanilang illegal drug transactions.
Ang mga suspek ay nakapiit na at nakatakdang sampahan ng kasong paglabag sa Republic Act 9165 o The Comprehensive Dangerous Drugs Act of 2002.
- Latest
