Gibanabanang moabot sa 500 ka mga panimalay ug mga estraktura nga gitukod sa kilid sa walo ka mga sapa sa Cebu City ang gikatakdang maapektohan sa himuong demolisyon
Gipahibalo sa Chief of Staff ni Cebu City Mayor Nestor Archival nga si Kenneth Siasar nga kasamtangan karong galibot-libot ang mga River Troopers sa siyudad.
Ang ilang trabaho, paghipos og mga impormasyon gikan sa mga barangay nga naagian aning walo ka mga sapa kun pila gyud ka mga estraktura ang maapektohan.
Gibasol man gud kaning mga balay ug estraktura sa kilid sa mga sapa nga maoy hinungdan sa paggamay sa gilapdon sa mga sapa ug diin sab pirmeng mabara ang mga basura maong moawas ang tubig ngadto sa kabalayan ug mga karsada .
Usa sa tumong sa paghawan aning tulo ka metros sa isi’g ka kilid sa mga sapa mao ang tinguha nga mahimo kining agianan sa tanan ilabi na sa mga ekipo nga gamiton paglimpyo sa mga agianan sa tubig.
Pero nabantayan nga daghang mga establisamento sa siyudad ang wala motuman aning 3-meter easement zone nga nalatid sa balaod.
Usa na niana kanang sa Pari-an Creek o Estero de Pari-an; kanang sapa-sapa sa may dalan Sikatuna duol sa Bonifacio Street sa utlanan sa Day-as ug Pari-an.
Hagbay ra na nasayod ang mga tag-iya ug ang ilang mga abogado aning mga establisamento kabahin sa balaod ug sa tinguhang recovery effort sa gobiyerno aning 3-meter easement zone, apan murag wala may niseryoso sa pagtuman.
Unsa may kalainan sa mga pobreng informal settlers sa mga kilid sa sapa itandi mga dagkong negosyanteng nagtukod pud og mga kongkretong estraktura sa kilid sa mga sapa?
Naa ba diay gipili ang balaod? Mao ni ang mga pangutana sa publiko kabahin aning dugay na kaayong isyu sa 3-meter easement zone sa tanang mga sapa.