Giaprobahan sa Sugar Regulatory Administration (SRA) ang Sugar Order No. 1 nga nag-classify sa sugar production sa nasud sa Crop Year 2026-2027 nga Class “B” kon 100% nga Domestic Market Sugar. Ang kamanduan sa SRA epektibo nga nagahin sa atong abot nga asukal sa atong panginahanglan una kita mohatag sa uban, labi na kon dili maayo ang forecast sa production. Makapahinumdum sa amahan nga nanghambog nga nagkalata na ang lanzones sa ilaha apan sa dihang gisukna kon ngano nga wala siya magdala aron ipaambit sa uban, yano ra usab mitubag nga, “Ay dah, kuwang ra’s akong mga anak Pre.” Fezteleern!
Naa apan wala diay
Gipanglantawan sa kalihim sa Department of Agriculture nga si Francisco Tiu Laurel Jr., nga mokunhod ang farm output sa bugas sa unang quarter (Q1) sa tuig 2027, tungod sa kadaut nga dala sa habagat ug sa hulga sa El Niño. Apan dili kuno angayan mag-panic kay adunay igong suplay ug stable usab ang presyo sa bugas. Dili kaha maparehas kini’ng pamahayag ni Laurel sa kumpare nga mipasalig nga maoy magdala’g tuba nga ilang imnon, apan sa dihang gipangutana ngano’ng wala kini dala’ng tuba, igo ra usab miingon nga, “Pastilan ka Pre, moingon gani ko nga naay tuba, wala na.” Madahaan!
Usaab, usaab!
Namahayag si Secretary Dizon sa DPWH nga prayoridad sa ilang 2027 budget ang paghulip sa kakulangon sa mga flood control projects nga gihimo sa nagkalain-laing administrasyon ingon man sa pagtiwas sa wala mahuman nga mga proyekto sa flood control. Gi-justify ra man sa DPWH ang pag-gahin na usab og pundo sa mga proyekto nga nahuman na unta, inay lutoson unta ang mga nangawkaw. Mora ra man ni’ng kalakiha og praktis sa choir, nga kon adunay mayabag, inay tangtangon ang yabag, igo ra moingon ang choir master nga, “Usaab, usaaab!” Saoonz!
”Unfit for consumption”
Gipanglabay na lang sa Bantayan Municipal Government ang mokabat 8.9 metric tons (178 ka sako) nga bugas human kini gideklarar nga “unfit for human consumption”. Kabahin ang maong bugas sa gipalit sa kanhi administrasyon apan matud pa sa kasamtangang mayor, papel lang ang gi-turn over ug walay physical nga imbentaryo nga gihimo. Dili maanindot hunahunaon sa katawhan kinig panghitabo hilabi na sa kadaghan’g gigutom. Husto ang pagya nga, “Sa kaluoy unta sa Ginoo, gihatagan kita’g mga lider nga may panglantaw ug may konsensya, apan dili lang maantigo mogamit sa maong mga hiyas.” Muleeng!
Magsige’g dulog sa asawa
Gipasi-ugdahan sa Cebu City Agriculture Department (CAD) dinuyogan sa Bureau of Fisheries and Aquatic Resources (BFAR) ang proyekto nga tilapia farming didto sa sa Barangay Tabunan, Cebu City. Maanindot ang maong programa tungod kay gawas nga matabangan ang mga mag-uuma nga madugangan ang ilang kita, nagpromote usab kini og integrated farming. Komento pa sa akong amigo, “Mas maayo pa magbantay ang mag-uuma sa fish pond sa tilapia kaysa magsige’g dulog sa asawa.” Pagkatoytoy!