Dako gyud ni nga problema ang pagsige og rotational brownouts nga nasinati karon sa Kabisay-an ug Mindanao. Apektado ani dili lang ang kinabuhi sa mga tawo kondili sa ekonomiya sab sa nasud tungod sa kadaghan sa mga negosyo nga maapektahan.
Apan naay daghang abundang libre untang makuhaan og enerhiya sa palibot dinhi sa nasud o renewable energy. Pwede kining kakuhaan og malungtarong supply sa kuryente.
Para sa mga dagkong planta nga makasuporta og mga dagko og konsumo sa kuryente sama sa mga malls, pabrika, mga buildings, ug daghan pa, pwedeng makasuporta ang hydropower plants, wind turbines, solar farms, geothermal power ug ang nag-unang gisaligan nga coal-powered ug crude powered generators.
Ang dapat gyud nilang unahon karon, mao ang paghatag og kagawasan ug suportahan ang mga inisyatiba ug dili lisud-lisuron ang mga konsumidor nga mag-instalar og kaugalingong sources sa kuryente.
Atol sa ikalimang State of the Nation Address ni Presidente Ferdinand Marcos Jr. iyang giduso ang pagpasar sa Sariling Kuryente Act para ang mga konsumidor maka-instalar og rooftop solar panels ug battery systems nga dili na kinahanglan og ERC permit.
Husto na nga kutob lang ang Energy Regulatory Commission sa pagtakda sa technical standards para sa luwas nga instalasyon anang mga solar panels ug batteries sa matag panimalay ug dili sad unta dapat pabayran o libre kini, kay ang mogasto sa materyales ang tagbalay man ug dili sa gobiyerno.
Kung milyones ka mga panimalay ang dili na magsalig og kuryente gikan sa power grid, dako kaayo ang reserbang matigom ang nasud bisan naa pay krisis sa lana ug kun naay katalagman.
Pinaagi sab ani, daghang kompanyang Pilipino ang mo-invest paghimo og mga solar panels, lithium batteries ug uban pa nga makatabang sa ekonomiya sa nasud ug makahatag og daghang trabaho.