Dili lang unta moro-moro

Matud pa ni Ombudsman Jesus Crispin Remulla, hapit na gyud ipasaka sa ilang buhatan ang kasong plunder batok kang kanhi House Speaker Martin Romualdez kabahin sa iyang pagkalambigit sa anomalosong mga flood control projects.  Kon ugaling madayon, makaingon na gyud ang katawhan nga, bisan tuod og hinay kaayo, apan nituyok gyud diay ang ligid sa hustisya. Dugang pa sa akong amigo, “Okay ra ko nga hinay ang hustisya basta dili lang pud moro-moro ang maong kaso kay paparts baya kaayo si Romualdez ug ang presidente”.  Madahaan!

Mas daghan ang ilaha

Lain na usab nga financial assistance nga tag-P12 mil ang ipanghatag sa kagamhanan ngadto sa 7 milyones ka mga kabos ug ubos ang kita nga mga banay nga naapektohan sa pagsaka sa presyo sa gasoline tungod sa kagubot sa Middle East ubos sa United Package for Livelihoods, Industry, Food and Transport (Uplift) assistance program.  Pastilan ning gobiyernoha, inay ang sulbad maoy ipahaum sa suliran, ang suliran na hinoon maoy gipahaum sa sulbad. Komento pa sa kadaghan, “Sa pagpanghatag ra ba’g ayuda mas daghan pa ang ma-ilaha kay sa maadto sa katawhan.” Fezteleern!

Amigo sa akong kaaway

Gipanghimakak ni Ombudsman Jesus Cripin Remulla ang pasangil nga gipunting lang sa iyang buhatan ang pagpasaka’g kaso sa mga senador nga sakop sa minoriya.  Molimod gihapon ang Ombudsman bisan kon klaro nga gitarget nila karon sila si Senador Alan Peter Cayetano ug Senador Robin Padilla tungod kuno sa ilang papel sa pag-eskapo ni Senador Ronald “Bato” dela Rosa sa senado unya nahikling na ang kaso nila ni Senador Villanueva ug Senador Escudero. Mora’g gisagop man tingale sa Ombudsman ang panultihon nga, “Ang amigo sa akong kaaway, ako usab nga kaaway.”  Muleeng!

Brayt pa ang unggoy

Wala palabya ni Defense Secretary Gilberto Teodoro ang video parody sa China kabahin sa Pilipinas diin gipakita niini nga ang Filipino sama sa usa ka unggoy nga nagsul-ob og Barong Tagalog ug nagkalo og salakot ug nga daw gikontrolar sa Japan ug sa Amerika.  Bisan sa atong panagsumpaki tali sa West Philippine Sea, daw naghinobra na usab ang China ni’ng ilang gibuhat nga pagbugalbugal kanato. Apan miingon hinoon ang akong amigong palahubog nga, “Mas brayt pa man ang mga unggoy kay sa tawo, kay kon manamin ang unggoy, kahibalo man siya nga iyang nakita sa salamin unggoy gyud.” Pagkatoytoy!

Basolon ang uban

Giangkon ni Cebu City Mayor Nestor Archival nga adunay pa’y mga bahin sa Cebu City Medical Center (CCMC) nga nakaplagan nga substandard ang pagkatrabaho apan iyang gihimug-atan nga ang maong mga kakulangon nahitabo sa mga nahauna’ng administrasyon.  Dili man tingale hingpit makapanghunaw ang mayor kabahin sa mga kakulangon sa CCMC kay kabahin man gihapon siya sa una’ng mga administrasyon isip miyembro sa konseho. Basin baya mahaum kita sa pagya-komedya nga, “Masayop man gyud ang tawo, apan kon basolon gihapon niya ang uban sa kasaypanan nga aduna siya’y kalambigitan, aaw, pamolitika na kana.”  Atala lagee!