Kaluoy sa usa ka traffic enforcer sa Cebu City Transportation Office (CCTO) kay gidasmagan siya sa driver nga nagmaneho sa usa ka SUV didto sa Escario Street atubangan sa Cebu Provincial Capitol kagahapon sa buntag.
Maayo gani kay hinan-aw tingali’g action movie ang traffic enforcer nga si Jovanie Verano ug pagkatumba niya sa karsada, abtik siya nga miligid aron dili maligsan sa puti nga SUV.
Gibiyaan ra unta sa driver ang gidasmagan nga traffic enforcer, apan dunay duha ka tawo nga nakakita sa hitabo ug abtik nilang gigukod ug nadakpan nila ang motorista nga taga Lutopan, Toledo City.
Uy, 62-anyos na man diay ang driver sa SUV ug nangangkon kini nga wa kuno siya makakita sa enforcer bisan og diha kini sa iyang atubangan. Hmmmm, dili gyud katuohan.
Kon mao na nga wa ka na makakita sa enforcer nga nagbarug sa atubangan gyud sa imong sakyanan, kay gipahunong ka man kay puno pa sa unahan nga eskina ug di ka pa makalusot, undang na lang og drive.
Matud ni Ariel Daan nga maoy migukod ug misita sa driver, nangangkon kuno ang driver sa SUV nga wa siya masayod nga nakadam-ag siya’g tawo. Pastilan.
Ang gidam-agan nga traffic enforcer nakaangkon og samad sa iyang bukton. Kon wa pa lagi makaligid, latayan gyud sa ligid. Base sa CCTV diha sa maong dapit, mora’g GO pa ang traffic signal alang sa mga sakyanan gikan sa Escario paingon sa north direction.
Apan gisenyasan sa traffic enforcer ang driver sa puti nga SUV nga dili usa mo-GO kay puno pa sa pikas eskina, ug posibleng dili siya makalusot dayon ug maabtan sa GO signal sa mga sakyanan nga mo-left turn paingon sa Fuente Osmeña direction gikan sa atubangan sa Kapitolyo.
Bisan og gisenyasan sa enforcer ang driver, mipadagan kini ug gidam-agan ra ang enforcer, natumba sa atubangan ang enforcer ug direyot gyud maligsi kon wa pa dayon makaligid.
Base sa lagda, ang mga driver, bisan pa og GO ang traffic signal, gidid-an gyud pagpadayon sa pagpadagan diha sa mga Junction Box, (kanang dunay kwadrado nga gibutangan og X sa mga eskina) aron dili makamugna og traffic.
Ang ordinansa sa siyudad naglatid nga kon ang usa ka sakyanan maabtan nga anaa sulod sa Junction Box kon GO na ang signal light sa pikas nga karsada, dakpon kini og pamultahon.
Si Raquel Arce nga maoy hepe sa CCTO, miila sa driver sa SUV nga mao si Bartolome Robles Piol, taga Lutopan, Toledo ug hayan pasakaan nila og kaso.
Unya, swerte kadtong duha ka bystander kay patrabahoon sila ni Vice Mayor Tomas Osmeña isip traffic enforcer.