Suliran ug solusyon

Sa pagsugod sa tingklase sa nasud, mobutho na usab ang dugay nang giatubang nga mga problema sa atong sistema sa edukasyon. Kini mao ang kakulang sa mga classroom, libro, ug mga magtutudlo sa mga pampublikong tunghaan.

Dili nato ikalimod nga ang kakulang sa mga classroom sa mga pampublikong tunghaan miresulta sa sobrang kadaghan sa mga estudyante matag klase, usa ka realidad nga nagpaubos sa kalidad sa edukasyon sa Pilipinas.

Dako usab ang kakulangon sa mga libro, nga maoy usa sa labing importanteng gamit sa pagkat-on sa mga estudyante. Dugang pa, daghan sa atong mga maayong magtutudlo ang mobiya ngadto sa pribadong eskwelahan o molarga sa gawas tungod sa mas taas nga sweldo ug mas maayong kondisyon sa trabaho.

Unsa ang angay nga buhaton sa gobiyerno, ilabina sa mga hingtungdang ahensiya, pagsulbad niining seryosong mga problema nga hagbay ra nga naglikos sa sistema sa edukasyon sa nasud sulod sa taas nga panahon?

Nag-una sa listahan ang panginahanglan pagbutang og igo nga pondo alang sa edukasyon. O ang Department of Education adunay usa sa labing dako nga alokasyon sa tinuig nga national budget. Apan sa atong nakita, dili gayud paigo kining maong budget alang sa epektibong operasyon sa maong departamento.

Ang maong budget dili lang alang sa konstruksyon sa dugang nga mga classroom, kondili apil na ang mga panginahanglan sama sa mga libro, school supplies, ug teknolohiya alang sa mas epektibo nga pagtudlo.

Angay usab nga dasigon ug suportahan ang mga magtutudlo pinaagi sa paghatag kanila og mas taas nga sweldo, benepisyo, ug training. Kini tungod kay ang maayong edukasyon mag-agad gayud sa maayong mga magtutudlo.

Ang edukasyon maoy yawe sa kalamposan sa nasud. Kung baskog ang sistema sa atong edukasyon, molambo sa tinud-anay ang kaugmaon sa atong kabatan-onan ug sa nasud.