Gihigugma mo ba ako?

Binasi: Jn. 21;15-19

Makatulo gyud balika ang maong pangutana ngadto kang Simon Pedro gikan sa iyang magtutudlo ug higala nga si Kristo Jesus.

Ang tulo ka mga pagpangutana sa mao lamang pangutana. Kini tungod kay alang sa nangutana mahinungdanon kaayo nga madungog ang tubag niini.

Alang kang Pedro nahasubo siya sa kapasikaran nga tingali nahibalik ang iyang guilty feeling niadtong higayon nga iyang gilimod sa makatulo ang atong Ginoo kay lagi nabutang man siya sa kakuyaw.

Apan ang maong pagpangutana kahigayonan man usab sa iyang bahin, nga pamatud-an sa kaulahian nga sa tinud-anay gayud iyang gihigugma ang atong Ginoo.

Ang maong paghigugma gipamatud-an pinaagi sa iyang kamatayon sa usa ka martir.

Segun sa kasaysayan, gilansang sa krus si Pedro nga pinatuwad gumikan sa hangyo niini nga patyon sa maong paagi kay lagi dili siya takus nga mamatay sa paagi nga namatyan sa iyang magtutudlo.

Sa atong panaw padulong sa kaluwasan, sa makadaghan kita mahimong mahisalaag. Sa makadaghan kita motalaw gumikan sa pagkaalinggat sa atong kahuyangan ug pagkamasalaypon.

Apan ang lintunganay ning tanan mao nga dili mahimong babag ang pagkadakin-as aron mobangon sa pagmatuod nga luyo sa malapok nga kagahapon dili halayo ang pagmatuod sa atong dakong gugma dili lang sa tawo kondili usab sa Dios.

Kuyog ni San Pedro kita moingon: “Oo, Ginoo sayud ka nahigugma ako kanimo gihigugma ko Ikaw.”