Pila ang angayang pangayoon nga child support?

Dear Atty. Divine,

Nagbuwag mi sa akong bana ug aduna mi duha ka anak nga nagpangidaron pa lang og 5 ug 7 anyos. Ako ang nag-custody sa mga bata. Ang akong bana mipasalig nga iyang sustentuhan ang mga bata. Apan wa pa mi magkasabot og pila ang dapat niyang ihatag nga financial support. Ang akong pangutana kun pila man dapat ang akong pangayuon kaniya nga financial support matag buwan? Mamahimo ba nga apil ko sa iyang suportahan bisan kun nagbuwag na mi kay wa man koy trabaho kay ako maoy nag-atiman sa mga bata? Daghang salamat sa imong pagtubag. —Nena

Dear Nena,

Ang atong balaod wa mohatag og fix amount kun pilay ihatag nga monthly child support kay magdepende man kini kun pilay panginahanglan sa bata ug sa kapasidad usab sa amahan. Ang basihan sa imong pag-compute sa child support mao ang ilang expenses matag buwan, sama sa pagkaon, tambal, education, clothing, housing ug uban pa nilang panginahanglan. Kun pilay expenses sa imong mga anak matag buwan, mao sab kana ang imong pangayuon nga monthly support sa ilang amahan. Mamahimo sab nga lakip ikaw nga mangayo og suporta sa imong bana kun kamo legally married kay bisan tuod kun nagbuwag na kamo apan kun wa pa ma annul ang inyong marriage, obligado gihapon ang imong bana nga mosuporta kanimo basi sa atong balaod. Thank you and HAPPY EASTER! —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.