Sunog

Ania na usab kita sa atong pag-obserbar sa Fire Prevention Month niining bulan sa Marso. Ug sa makausa pa, wala ug tuo ang mga pahimangno gikan sa otoridad ug ubang ahensiya sa kagamhanan alang sa kanunay nga pagmatngon batok sa mga insidente sa sunog.

Tungod lagi kay ania na kita sa panahon sa ting-init, kinahanglan nga  kanunay kita nga alerto batok sa mga sunog. Matag tuig na kining Marso nga gigahin sa kagamhanan isip Fire Prevention Month isip pagpahimangno kanato alang sa ka importante sa magmatngon batok sa sunog.

Dinhi sa Sugbo, sukad niadtong Marso 1, pipila ka insidente sa sunog ang mitumaw. Una nga insidente ang nahitabo nga sunog didto sa dakbayan sa Lapu-Lapu kaniadtong Sabado sa hapon, unang adlaw sa Fire Prevention Month.

Gisundan usab kini sa dakong sunong nianang lalom nga kagabhion sa Barangay Mambaling sa dakbayan sa Sugbo diin subra sa usa ka gatus ka panamalay duol sa South Road Properties ang naugdaw.

Sumala sa datos sa Bureau of Fire Protection (BFP), ang kadaghanan sa mga insidente sa sunog mahitabo sa panahon sa ting-init, diin ang taas nga temperatura sa panahon mahimong hinungdan sa pagsugod sa sunog.

Dili ikalimod nato nga ang sunog dili lamang magdala og dako nga kadaot sa kabtangan kondili usa usab ka dakong hulga sa kinabuhi sa katawhan. Mao nang ang BFP kugi sa pag-awhag sa tanan nga sundon ang mga lagda alang sa atong kaluwasan batok sa sunog.

Pipila niining mga pahimangno mao ang kanunay sa paglikay sa pagka-overload sa kuryente, pag-seguro nga limpyo ug hapsay ang palibot sa panimalay, pag-andam og fire extinguisher, ug  pagbaton og  exit plan panahon sa sunog.

Ang atong kaluwasan mao ang labing importante. Busa, mag-amping kita ug magtinabangay aron malikayan ang insidente sa sunog. Hinuon dili lamang matag Marso kondili matag bulan kita mag-obserbar sa Fire Prevention Month.