Dear Atty. Divine,
Aduna koy anak sa akong previous relationship. Wa gi-acknowledge sa papa ang bata og ang akong apelyido ang gigamit niini. Karon naa koy boyfriend nga gusto nang mangasawa nako. Magpakasal na kami next month ug gusto niya nga siya na ang mabutang nga amahan sa Birth certificate sa bata. Iyang gi-suggest nga among ipa late registration ang bata aron mabutang iyang name as father sa birth certificate. Ang akong pangutana kun mamahimo ba kini namong buhaton nga nahuman na man og rehistro ang bata atol sa iyang pagkatawo? Daghang salamat. -- Mila
Dear Mila,
Dili mahimo nga inyong ipa late register ang Birth Certificate sa imong anak kay magdoble na ang iyang registration. Gawas pa niini, makonsiderar usab nga Simulation of Birth ang inyong buhaton pagbutang sa imong future husband isip amahan kay dili man siya ang matuod nga biological father sa bata. Unya kun mag double registration ang bata, ang first registration maoy mo prevail o mopatigbabaw.
Magkinahanglan ka pa sa korte kun imong ipa cancel ang second registration. Mas maayo nga imong ipaagi ang tanan sa legal pinaagi sa pagpasaka og Petition for Adoption sa Korte sa imo unyang bana. Sagupon sa imong bana ang imong anak ug kun ma grant kini sa court, manduan sa korte ang Civil Registrar sa pag-usab sa Birth Certificate sa imong anak ug ang apelyido unya sa imong bana maoy gamiton sa bata ug ang imong bana mao sab unya ang mabutang nga amahan sa imong anak sa iyang birth certificate. Thank you and God bless. -- Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ divina@yahoo.com ug akong tubagon ang inyong pangutana pinaagi sa akong column matag Miyerkules, Sabado og Domingo.