Ilahi lang

Giangkon sa mga opisyal sa Barangay Pulpogan, Consolacion, lalawigan sa Sugbo nga naapektohan ang kinatibuk-ang komunidad sa ilang Barangay tungod sa kontrobersiya nga naglambigit sa duha nila ka mga opisyal sa barangay.

Kahinumduman nga nasakpan sa asawa ang iyang bana nga konsehal ug ang chairperson sa Sangguniang Kabataan sulod sa usa ka motel sa Barangay Pajo sa dakbayan sa Lapu-lapu niadtong Abril 2, 2024. Ang pagkasakop resulta kini sa pagsunod sa asawa sa iyang bana ug sa pagtaho niini ngadto sa kapolisan.

Sa opisyal nga pamahayag sa Barangay Pulpogan nga ilang gimantala sa ilang opisyal nga Facebook page, giingon niini nga padayon silang komitido sa ilang mga gimbuhaton ug ipatigbabaw ang balaud sa ilang paghimo niini. Apan ilang giklaro nga dili nila tugotan nga mahitabo pag-usab ang nahitabo sa duha nila ka mga opisyal sa Barangay.

“Wala ug dili mo-tolerate (motugot) ang Barangay sa mga salaudnon nga maglangkob sa Violation against Women and their Children o unsa mang kalapasan sa gisangon nga mandato sa abaga sa abaga sa mga opisyal, lakip na niini ang immoralidad,” kini ang giingon sa opisyal nga pahayag sa Barangay Pulpogan, Consolacion.

Gikonpirmar sa mga opisyal sa barangay nga napasakaan na og kaso ang konsehal ug ang gikarelasyon niini nga SK chairperson uban sa paghangyo sa publiko nga tugotan na lang ang hukmanan sa paghukom sa kaso.

Bisan tuod dili nato malahi ang isyu sa moralidad sa usa ka opisyal sa gobiyerno ug bisan sa pribado nga buhatan, apan dili pud nato angayan nga kalimtan nga lahi ang isyu sa trabaho ug moralidad.

Gani ubos sa Akta Republika 6713 o Code of Conduct and Ethical Standard for Public Officials and Employees dili basihanan sa pagtang-tang o pagsuspenso sa  trabaho sa gobyerno ang moralidad.

Busa ilahi ang kaso sa mga opisyal nga dili konektado sa ilang trabaho ug sa ilang personal nga binuhatan.