Huwaw

Gideklarar na sa konseho sa dakbayan nga ubos sa state of calamity ang 28 ka mga bukirang barangay sa Cebu City tungod sa grabing epekto sa huwaw.

Giawhag sa konseho ang buhatan ni Mayor Michael Rama nga mohimo og mga lakang aron matubag ang panginahanglan sa mga apektadong barangay.

Apan sa iyang press conference sa miaging adlaw, daw napikal ang mayor sa gihimo sa konseho. Klarong nainsulto ang mayor nga daw sa gitudloan siya sa konseho unsay angayang buhaton.

Nibawos ang mayor og hagit sa mga konsehal nga mosuroy sa kabukiran sama sa iyang gibuhat ug personal nga tubagon ang panginahanglan sa mga molupyo inay nga magpunay lang og palabang og resolusyon.

Nihimo hinuon ang mayor og deklarasyon nga duna nay water crisis nga nasinati ang syudad. Ambot unsay mahimo sa iyang deklarasyon aron pagsulbad sa problema.

Iya kunong tigumon ang iyang mga tinudlo sa MCWD aron tun-an unsay maayong paagi aron maminusan ang epekto sa huwaw.

Kun karon pa sila magtuon nga nangliki na ang yuta ug naughan na ang mga tinubdan, ambot may mapaabot ba ang publiko gikan nila.

Dugay na ang pasidaan sa PAGASA sa pag-igo sa El Ni o. Ug kun wala ko masayop, dugay na sab nga nagsige og aghat si Konsehal Jun Alcover, tsirman sa committee on agriculture sa konseho sa syudad, ngadto sa executive department nga seryosohon ang pagpangandam sa posibleng epekto sa huwaw.

Gani dihay session sa konseho nga mipadayag si Alcover sa iyang kasagmuyo tungod kay way tubag gikan sa ehekotibo sa iyang mga awhag sa pagpangandam.

Ug basi sa labing awahing pamahayag sa mayor, nakasabot ko nganong wala mokihol ang executive department--di gusto si Rama tudloan siya unsay angayang buhaton.

Gikinahanglan ni Rama ang abag sa konseho busa di siya angayang mainsulto kun dunay sugyot gikan sa mga konsehal. Kay ang tinuod dako siya og problema ang direksiyon sa iyang administrasyon.

Ug nabisto ni atol sa special session sa konseho sa miaging adlaw nga nagtuki sa kapin sa P94 milyones nga annual investment plan pagtubag sa epekto sa El Ni o.

Tiaw mo bay lakip sa ilang gipangayo nga pundo ang minilyon nga budget alang sa abuno ug binhi niining panahon sa huwaw.

Ug salamat sa inanay na nga pag-aslom sa relasyon sa mayor ug sa konseho tungod kay duna nay mga konsehal nga nakaako pagbadlong sa wala magkadimao nga programa.

Asa ka man intawn mangita nga problema sa tubig ang angayang sulbaron mamalit na hinuon ug binhi ug abuno. Pastilan!