Init nga panahon

Napugos sa paghunong sa pagpananom sa ilang umahan ang mga maguuma sa bukirang bahin sa dakbayan sa Sugbo tungod sa kainit na sa panahon nga nakapahubas sa tinubdan sa tubig nga maoy ilang gigamit sa pagpamubo sa ilang mga pananom. Mao kini ang gitugan ni Casimero Pilones ang Presidente sa Alliance of Cebu City Farmers Association.

Ang paghunong sa pagpananum sa mga mag-uuma mao ang hinungdan sa pagkabhang sa produksiyon sa mga maguuma sa dakbayan sa Sugbo nga miabot sa 80 porsiyento.

Tungod niini, ang Konseho sa dakbayan sa Sugbo mipaubos sa 28 ka barangay nga nahimutang sa bukirang bahin niini sa State of Calamity niadtong Marso 27 ning tuiga. Ang City Agriculturist nga si Joey Baclayon mitugan atol sa interview sa usa ka sibyaanan sa radyo nga ang mga Barangay nga gipaubos sa State of Calamity mao ang Budlaan, Binaliw, Paril, Taptap, Pulangbato, Mabini, Malubog, Agsungot, Guba, Lusaran, Adlaon, Cambinocot, Pamutan, Sirao, Sapangdaku, Toong, Buhisan, Pung-ol Sibugay, Babag, Sudlon 1, Sudlon 2, Bonbon, Sinsin, Kalunasan, Buot, Tagbao, Busay ug Tabunan.

Si Kapitan Dennis Dabuco sa Barangay Malubog miingon nga ang mga mag-uuma sa ilang barangay mihukom sa pagtugom sa ilang mga binhi aron ilang matanom sa pag abot na sa ting-uwan.

Ang PAGASA mipahibawo niadtong Marso 7 nga ang kainit sa panahon mahibalik ngadto sa normal sa ikaduhang kuwarter ning tuiga o sa buwan sa Abril ngadto Hunyo diin mopuli na usab ang ting-uwan nga magsugod sa buwan sa Hunyo ngadto na sa Agosto.

Ang kainit sa panahon nga nakapahubas sa tinubdan sa tubig nga nakapaminus sa supply sa tubig makapahigmata na unta sa mga tawo nga dili maantigo modaginot sa tubig o sa mga magusik-usik sa tubig. Motuhop na unta sa ilang mga alimpatakan unsa ka mahinungdanon ang tubig.

Sa pagnihit sa tubig dili lang ang mga maguuma ang naapiktohan niini kun dili apiktado kitang tanan. Ang pag ubos sa produksiyon sa umahan makapaminus sa pagkaon sa talad kananan ug makapamahal sa prisyo sa mga produktong pang agrikultura.