Pinakasuwerte nga tawo o outlet?

Napamatud-an na ba nga dili tinuod ang giingon nga mas maigo ka pa sa kilat sulod sa pito ka higayon kay sa makadaug ka sa lotto? Nakita sa listahan sa PCSO nga gisumitir ngadto sa Senado ang usa ka tawo nga nakadaug sa lotto 20 ka higayon sulod lamang sa usa ka buwan. Gawas niini, may tawo usab nga nakadaug sa lotto 10 ka higayon sa usa lang pod ka buwan.

Dili lamang kini improbable kun dili usa usab kini ka imposible, matud pa ni Senador Koko Pimentel nga adunay degree sa Mathematics sa Ateneo de Manila University. Ang senador nagkanayon nga imposible nga nagkapariha lang ang pangalan sa mga nakadaug tungod kay parihas man ang mga duwa nga ilang nadag-an.

Usa si Pimentel sa mga senador nga miawhag og imbestigasyon sa mga dili natural nga pagdaug sa Jackpot nga primyo sa lotto. Giingon sa senador nga ang sunod-sunod nga pagdaug sa mga jackpot nga primyo sa lotto nagsugod human gipadakan sa PCSO ang premyo niini og P1.7 bilyon.

Ang general manager sa PCSO nga si Mel Robles nagkanayon nga kun ang usa ka tawo mikuha sa iyang daug sa lotto sulod sa kadaghan nga higayon, wala kini magpasabot nga siya mismo ang nakadaug sa lotto tungod kay ang midaug nga ticket puwede kini nga mabalhin ngadto sa uban nga tawo. Buot ipasabot, puwede nga manugo og laing tawo ang nakadaug aron maoy mokuha sa iyang daug. Kasagaran nga sugoon sa nakadaug mao ang Lotto agent tungod sa pipila ka rason.

Gipasabot ni Robles nga ang datus nga nakita sa senado dili mahitungod sa pagdaug kun dili mahitungod kini sa pagkuha sa premyo.

Kun mao man ugaling kini, buot bang ipasabot ni Robles nga adunay lotto outlet nga adunay 20 ka tawo nga nakadaug sulod lang sa usa ka buwan? Pagkasuwerte ba ning maong outlet.

Hinuon, dili pod boang ang PCSO nga mosumitir og lista ngadto sa Senado nga mao ra pud diay ang motuok sa ilang liog.