Alkanse ang siyudad

Husto gyud ang tumong ni Cebu City Mayor Michael Rama nga undangon na kining kasabotan sa siyudad ug sa Tokagawa Global Corporation kabahin sa pagkolekta og parking fees sa mga sakyanan nga iparking daplin sa karsada.

Sa laktud, nabentahaan niining maong kasabotan ang kagamhanan sa siyudad, ug tabla ra og ang Cebu City government mihatag og higayon nga ang Tokagawa Global Corporation makahimo og negosyo sa atong mga karsada.

Unsaon, nagtuo man ko nga dunay mga opisyal kaniadto nga mipabor niini, ambot kon unsa kaha y rason. Ilang gipakita nga ang siyudad kuno, mikita lang og kapin sa P7.7 milyones sa tibuok tuig.

Ang ang gibasehan nila dili ang kita nga kolekta gikan sa Enero ngadto sa Disyembre. Nagpili ra sila og mga buwan nga gagmay og kita og maoy gibasehan nila, unya ibanan kuno sa gasto, nabinlan na lang kuno og P8 milyones ang Cebu City.

Mao nga nakumbinser nila ang mga opisyal sa siyudad kaniadto atol sa administrasyon ni kanhi mayor Tomas Osme a ug gisuportahan sab sa City Council nga aprobahan ang Joint Venture Contract tali sa Tokagawa.

Apan gitan-aw nako pag-ayo ang rekord sa CITOM kaniadto, dagko og koleksyon uy. Matud ni Sofia C. Bacolod, ang hepe sa Billing and Collection Section sa Cebu City Road Management Authority nga sa tuig 2013 ang siyudad mikolekta og P42 million.

Pagka 2014, ang koleksyon miabot og P38 milyones; pagka 2015 P36 milyones; sa  2016 mikunhod sa P33 milyones; unya P38 milyones sa 2017; misaka ngadto sa P39 milyones pagka 2018.

Pagka 2019, mibanos na ang Tokagawa pagpangolekta, apan dinhi lang sila sa downtown area, ang uptown parking slots gidumala gihapon sa CITOM kaniadto.

Apan kay ang CITOM pa man ang padayong nangolekta sa parking areas sa uptown, sama sa Fuente ug uban pang lugar, ang koleksyon miabot gihapon sa P20 milyones.

Pagka 2020, niinsister ang nagdumala sa CITOM nga samtang ang Tokagawa ang gitugyanang mangolekta sa downtown, mibutang sab kini og collectors. Sa ato pa, makakolekta sab og gamay ang siyudad.

Mao nga sa tuig 2020, samtang ang siyudad mokolekta lang og P8.7 million sa tibuok tuig, apan ang nakolekta sa siyudad miabot gyud og P12 milyones, ug pagka 2021 misaka pa gani sa P17 million.

Apan pagka 2022, gitugyan na man gyud hinoon ngadto sa Tokagawa ang pagkolekta sa mga sakyanan nga mamarking sa tibook siyudad, apil ang uptown, mao nga P7.4 million na lang ang nadawat sa siyudad.

Ang Tokagawa mangolekta pa gani bisan sa Domingo nga wa itugot sa ordinansa.

Anhi ninyo matimbang-timbang kon angay ba nga ibalik ang pagpangolekta sa parking fees ngadto sa siyudad.