Bus terminal

Maayo ba nga undangon na ang pag-operate og bus terminal diha sa Natalio Bacalso Avenue, ug adto na sa South Road Properties (SRP) ang south bus terminal?

Para nako, husto gyud kini kaayo kay dili ikalimod nga nakadugang gyud sa problema sa traffic ang pagsu’d sa daghang bus diha sa Natalio Bacalso Avenue.

Kaniadto sa gamay pa ang mga sakyanan, ang bus terminal diha sa Natalio Bacalso Avenue nga gitawag pa og South Expressway, maoy terminal sa tanang bus gikan sa probinsiya.

Gani, nakaabot pa ko nga gikan sa among dapit sa Bogo kaniadto, anha gyud diha kutob ang bus nga among sakyanan ug mosakay na sab mi og laing bus paingon sa Barili.

Ini’g pauli namo, anha gihapon sa terminal diha sa South Expressway moparking ang mga bus, ug anha ra sab kami mosakay og laing bus para sa Bogo.

Wa gyud hasol, apan kon ibalik kining mao nga sistema karong higayona, mora’g lisud na kaayo kay daghan na kaayong bus nga nagbiyahe sa lainlaing dapit sa probinsya.

Kon mosu’d ang maong mga bus dinhi sa kinapusorang bahin sa siyudad, aw makadugang gyud sila sa problema sa traffic.

Kabahin sa bus terminal nga anaa sa Natalio Bacalso Avenue, nakamugna gyud kini og traffic kay ang mga bus dugay kaayo makasu’d sa terminal ug mababagan nila ang mga sakyanan nga moagi atubangan sa terminal.

Dayon, iniggawas sa mga bus gikan sa terminal, magkuyog ang tulo, o upat ka bus ug mababagan na sab nila ang mga sakyanan nga moagi kay kinahanglan man kini nga molabang sa karsada paingon na sa ilang destinasyon.

Unya, duna pay ubang driver sa bus nga masinupakon gyud sa lagda nga dili na sila mamik-ap og mga pasahero diha sa karsada, apan daghan kanila moparking pa diha sa atubangan sa terminal.

Kay dagko man ang mga bus, aw makabalda na usab sila sa pag-agi sa mga sakyanan nga mopaingon sa south direction.

Pananglit ang siyudad mogahin og luna nga himoong bus terminal diha sa SRP, ang pangutana, kinsa may mo-operate niini ang provincial Capitol ba gihapon?

Para kanako, pwede ra man kon ang Capitol gihapon ang mo-operate sa terminal sa mga bus nga mobiyahe paingon sa probinsya, apan ang yuta nga gamiton sa terminal, ibaylo sa yuta nga ilang sa Kapitolyo diha sa Natalio Bacalso Avenue.

Dili man sab maayo nga ang yuta sa SRP nga butangan sa terminal iya sa siyudad, unya ang mo-operate sa terminal mao ang Kapitolyo.

Angay nga tukion kining maong isyu sa atong mga magbabalaod sa siyudad, ug apil na sa probinsya.