Gi-ayran

Laing interesting nga sangka dinhi sa dakbayan sa Sugbo sa 2025 elections mao ang pagkakongresista sa north district.

Kini human ipahibawo sa duha ka mga nag-unang partido sa dakbayan kinsa ang ilang mga manok pagka-kongresista.

Ang Barug-PDP Laban ni Mayor Michael Rama ug ang Bando Osmeña Pundok Kauswagan ni kanhi mayor Tomas Osmeña pulos nag-ayad ni Congresswoman Cutie del Mar, ang incumbent nga kongresista sa north district.

Ang BOPK nga maoy partido ni del Mar dihang midaog siya niadtong 2022 dili na mosuporta niya.

Samtang ang Barug-PDP Laban nga unang miingon nga ilang sagupon si del Mar isip kandidato pagka-kongresista sa 2025 duna na say laing kandidato.

Si Osmeña mideklarar nga si konsehal Mary Ann delos Santos maoy kandidato sa BOPk pagka-kongresista sunod tuig. Samtang si Rama buot nga si konsehal Dondon Hontiveros mobalhin sa north district aron maoy mokandidato pagka-kongresista sa ilang partido.

Managlahi ang rason ni Osmeña ug Rama nganong ilang gi-ayran si del Mar. Matud ni Osmeña dili nila igkita si del Mar samtang si Rama wala kauyon sa pagsuporta ni Cutie sa People's Initiative aron amendahan ang Batakang Balaod.

Apan bisan sa gihimong pag-ayad sa dagkong mga partido, dili matuis ang kamatuoran nga nagpabiling llamado si del Mar. May partido man o wa nakagamot na si del Mar sa north district nga gidumala sukad pa kaniadto sa ilang pamilya. Incumbent si del Mar busa duna siyay magamit nga makinarya ug resources sa kampanya bisan way mosabak niya nga partido.

Apan imposibleng mahitabo nga way partidong mosagop ni Cutie. Posibleng mag-ilog si MCWD chairman Joey Daluz III ug kangi Customs Commissioner Yogi Ruiz pagsagop ni del Mar.

Si Cutie wala makasuway og pilde. Gani dihang una silang nagbagat ni delos Santos niadtong 2010 iya kining gipilde og kapin sa 40 mil ka boto.

Niadtong 2022 gilampurnas pud ni Cutie si kanhi konsehal Niña Mabatid bisan wala na ang iyang amahan nga mitabang sa kampanya.

Masukod hinuon sa 2025 kun mahinayon nga magsangka sila pag-usab si del Mar ug delos Santos kinsa gyuy nanag-iya sa command votes sa north district--ang BOPK o si del Mar?

Usa ka butang ang sigurado, mabahin ilang mga dumadapig ug pabor ni alang ni Hontiveros kun makalusot sa Comelec iyang kandidatura sanglit siguradong makamugna og dakong kontrobersiya ang iyang pagbalhin og distrito.