Di kalikayan ang pagduda

Dugay nang kalbaryo sa mga motorista sa habagatang Sugbo ang huot nga dagan sa trapiko sa mga lungsod ug syudad sa unang distrito sa lalawigan.

Ug sagad sa hinungdan ini mao ang way kahumanan nga mga proyekto sa Department of Public Works and Highways. Kun nakabantay mo magbalhin-balhin lang ang pag-ayo sa karsada gikan sa dakbayan sa Talisay paingon sa Sibonga nga mora'g wa gyuy kahumanan.

Ambot nanobra lang ba gyud kaha kakugihan ang responsable niining maong mga proyekto nga bisan kadtong karsada nga hamis ug murag dili pa dugay nahuman og ayo gub-on ug ayohon na pud og balik.

Lisud ang mamasangil apan di kalikayang magduda nga dunay mga tawo nga mihimong gatasan sa way kinutuban nga mga pag-ayo sa karsada bisan dili pa angayang ayuhon.

Ug tungod sa kahakog  sa pipila nasakripisyo dili lang buhis sa katawhan kun di lakip na ang ilang oras ug siguridad sa publiko.

Laing problema mao ang pagpasagad sa DPWH ug sa mga kontraktor niini sa ilang trabaho nga maoy hinungdan sa problema sa trapiko ug nagbutang sa piligro sa mga motorista.

Pananglitan ang gihimong pagpalapad sa karsada diha sa lungsod sa San Fernando nga maoy nag-unang hinungdan sa traffic problem sa maong dapit. Dugay na kaayo ang maong proyekto apan wa gyuy pagpakabana ang DPWH ug bisan ang kagamhanan sa lungsod aron apurahon ang kontraktor.

Daghang salamat nga si Gobernador Gwen Garcia mismo nakadeparar niini.

Namatikdan sa gobernador ang maong problema hinungdan nga gimando niini ngadto sa DPWH ug sa mga kontraktor niini nga hunongon ang pagpalapad sa karsada diha sa San Fernando hangtod nga maatiman niini ang ilang gipasagdan nga mga istraktura nga nag-ali sa karsada hinungdan sa problema sa trapiko sa maong lungsod.

Hinaot masulbad na ning maong problema karon nga miinterbinir na ang gobernador aron makaginhawa na intawn og luag ang mga mobiyahe paingon sa habagatan.

Ug labaw sa tanan hinaut matugkan og uwaw  ug konsensiya ang mga mapahimuslanon nga klarong mihimong gatasan sa pag-ayo kunohay sa karsada aron pagtagbaw sa way kinutuban nilang kahakog.