Hasol

Gitun-an ron ni Presidente Bongbong Marcos ang sugyot sa Department of Agriculture nga inay kwarta, bugas ang ihatag sa gobiyerno ngadto sa mga beneficiary sa Pantawid Pilipino Program o ang mas naila nga 4Ps.

Atol sa tigom didto sa Malaca ang gisugyot sa DA nga ipalit og bugas gikan sa National Food Authority (NFA) ang budget sa rice subsidy alang sa 4Ps gikan sa Department of Social Welfare and Development.

Kini aron dili kuno maapektohan ang mga beneficiary sa 4Ps sa pagsaka sa presyo diha sa merkado ug di na sila kinahanglang makigkumpetensiya sa mga adunahan pagpalit og bugas.

Ang matag-pamilya nga membro sa 4Ps dunay P600 matagbuwan nga rice subsidy. Kun bugas ang direktang ihatag sa mga beneficiary pila man sad ka kilo matag-buwan? Dili kaha gusto lang pud moginansiya ang nagsugyot niini?

Ang tinuod dili ni bag-o ang maong sugyot. Gihimo na sab ni kaniadto apan mas gipaboran ang kasamtangan nga paagi paghatag sa hinabang pinaagi sa cash tungod sa praktikal nga rason.

Gawas pa mao ni ang gilatid sa Implementing Rules and Regulation (IRR) sa balaud nga nag-institutionalize sa conditional cash transfer program sa kagamhanan.

Naka-imagine mo unsa ka hasol alang sa DSWD maghakot og bugas ngadto sa kabarangayan matagbuwan aron ipanghatag sa mga beneficiary sa 4Ps?

Ambot nganong labihan ba gyud nato kahilig manghilabot sa mga butang nga di angayang hilabtan?  Wala ba makontinto ang mga opisyal DA sa pangwarta sa pagpayuhot og mga produktong agrikultura nga hangtod ang paagi sa paghatag sa hinabang sa 4Ps buot naman sab nilang hilabtan?

Sa kadaghang problema sa departamento sa agrikultura nga angayan nilang unahon sama sa unsaon pagpalambo ang kaugalingon nato nga abot sa uma aron makab-ot ang food sufficiency nga di na kinahanglang magsalig sa importasyon.

Ang way pu-as nga conversion sa mga umahan ngadto sa mga subdivision maoy nag-unang suliran nga nakahulga sa atong food security ug maoy angayang problemahon sa DA, dili ang paagi paghatud sa hinabang alang sa 4Ps.