Tabang sa CCTV

Pinaagi sa tabang sa CCTV natultolan sa kapolisan ang sakyanan nga gidudahang maoy nakadasmag patay sa basketbolista nga si Jeslar Uriel Larumbe niadtong Domingo, Pebrero 4, sa buntag didto sa karsada duol sa Redemptorist Church. Ang sakyanan, usa ka Mazda CX 7 color grey, didto makit-i sa kapolisan nga giparking sa may Cabajar Street sa Barangay Guadalupe, Cebu City. Dunay lumping sa iyang dulong ug ingon man wangwang ug blinkers.

Ang maong sakyanan giingong gimaniho sa usa ka Karl Tan apan gipanag-iya kini sa iyang iyaan. Dihang nahinabi ni Atty. Ruphil Ba oc sa dyHP kagahapon sa buntag, si Tan kusganong nanghimakak nga siya maoy nakadasmag ni Larumbe.

Matud niya nga duna siyay higala nga mihuwam sa maong sakyanan ug nga maoy nagmaniho niini sa tibuok adlaw ng Sabado ug Domingo. Apan dunay mga silingan ang mitug-an sa samang interview sa dyHP nga ilang nakit-an si Tan nga mao gyuy nagmaniho sa sakyanan dihang mibiya ni sa ilang dapit.

Bisan pa hinuon niini, wala pa isipa sa kapolisan nga suspek si Tan sa kamatayon ni Larumbe. Ang kapolisan mitug-an nga nangita pa sila og dugang ebidensiya nga magtumbok ni Tan nga siya gyuy nagmaniho sa sakyanan.

Apan kun ang iyaan miingon nga ang naggamit sa sakyanan mao si Tan ug duna say mga CCTV nga nagmatuod nga ang maong sakyanan maoy midasmag ni Larumbe unsa may laing ebidensiya nga gihuwat sa kapolisan aron ilang madakop si Tan?

Nakasabot ko nga nagmatngon ang kapolisan tungod kay upat na ka adlaw ang milabay sukad sa hitabo. Apan dili ba mahimong gamiton sa kapolisan ang sagad nilang rason hot pursuit---kun duna silay dakpon nga tag-as og apelyedo?

Ang maong hitabo naghatag nato og leksiyon unsa ka mahinungdanon sa CCTV aron pagsulbad sa krimin. Ug hinaot nga himoon kining prioridad sa kagamhanan sa dakbayan nga butangan og CCTV ang tanang intersection sa syudad ug dili lang magsalig sa mga pribadong mga edipisyo ug patigayon.

Kun wala pay CCTV tingali hangtod ron bakante pa gyud ang kapolisan kinsay nakadasmag sa biktima.