Kadaghanan nato nakadungog ning maong pamahayag: “Kun magmatinumanon lang ta sa Ginoo, wala gyud untay pag-antos, daghang blessings atong madawat dili kita magkalisud lisud! Amen? Amen!” Gitawag kini og prosperity gospel.
Sa pagkatinuod lang, dili mahimulag ang krus diha sa atong kinabuhing Kristohanon. Kabahin na kini sa atong kinabuhi.
Ug gani ang Ginoo nagkanayon man nga kun si kinsa kadtong buot mosunod kaniya kinahanglang mopas-an sa iyang krus ug mosunod kaniya. Hawa sa krus dili kita Kristohanon.
Ang panalangin madawat man gyud ni bisan kinsang tawo. Apan atong hinumdoman nga dili sa tanang panahon sabton nato ang panalangin ingon nga materyal nga panalangin lamang.
Dugang pa, mahimong sabton nato ang pagka Kristohanon ingon nga relasyon nga nagasukad sa reward and punishment basis.
Kun magbinunotan anaa ang langit kun maglunang sa sala anaa ang impiyerno.
Mas nindot gyud unta kun ang maong pagtinarong nagasukad sa atong dakong gugma sa atong Ginoo nga si Kristo Jesus ug dili sa gipasupot nga katuyoan sa panalangin nga gipaabot.
Sa atong pagkatawhanon kita makasala. Apan wala kini magpasabot nga dili prosperous ang atong kinabuhi. sayud kita nga bisan pa man sa atong kahuyang padayong nitabang kanato ang grasya.
Ang prosperity gospel dili maoy sukaranan sa atong panlimbasog alang sa pagkabalaan.