Didto sa Capocastello Italia gilusad ang usa ka Belen niadtong Disyembre 23, 2023 diin gipakita ang linain nga bersiyon sa Belen.
Nakita dinhi nga imbis anaa sila si San Jose ug Santa Maria, nihulip naman hinuon ang duroha ka mga babaye nga sila si Maria ug ambot kinsa tong usa. Nakaani kini og nagkadaiyang mga panahom.
Ang mga tradisyonal nikondena niini ingon nga blasphemous ug makaululaw.
Daghan sa mga konserbatibo ang matud pa nasuko gyud ning maong kalamboan.
Apan ang kura paroko sa maong parokya ni San Pedro ug San Pablo sa Capocastello di Mercogliano nga si Padre Vitalliano della Salla ang nipayag sa iyang tumong: “Pinaagi ning maong Belen buot nakong ipakita nga karong mga panahona duna nay bag-ong hulawagway sa pamilya.
Dinhi sa among Parokya daghang mga bata kang kansang mga ginikanan nagbulag, nagdiborsiyo, ang uban anak sa mga magtiayong bayot o tomboy, ang uban sa mga batan-ong inahan o dili ba kaha mga pinaangkan.”
Matud pa niya nga ang iyang pamaagi iya lamang gipasubay sa bag-o lang gipagawas nga dokumento nga Fiducia Supplicans.
Anaa man ang pagtahud sa mga LGBTQ community. Apan wala kini magpasabot nga bisan ang naandang bayhon sa kamatuoran nga naa sa balaang kasulatan ang atong usbon aron lamang pag-accommodate sa demand sa kasamtangan.
Walay absolute nga kagawasan dunay kinutoban. Ang maong kura walay pagtahud sa ubang mga sakop sa iyang parokya.
Tinuod nalipay ang pipila apan naguol ug nasakitan ang kadaghanan.
Mga pag-ampo alang sa mga nakutaw sa ilang kaugalingong duhiraw.