Giingon ni Bise Presidente Sara Duterte ngadto sa mga tigbalita nga dili siya interesado nga magpapili pagka presidente sa tuig 2028 nga nasudnong piniliay.
Iyang giingon nga ang iyang hukom sa umaabot mag-agad kini sa plano sa Ginoo. Iyang giingon nga wala siyay intensiyon kaniadto nga mag-bise oresidente apan nahimo siyang bise presidente sa nasud.
Sa dihang mitiwas si Bise Presidente Gloria Macapagal Arroyo sa termino ni Presidente Erap Estrada human kini pugos nga gipakanaug sa pagka presidente sa mga tawo nga wala makauyon kaniya giingon ni Presidente Gloria Macapagal Arroyo nga dili siya magpapili pagka presidente apan nagpapili siya pagka presidente ug napili siya nga presidente.
Sa dihang giagni si Davao City Mayor Rodrigo Roa Duterte sa pagpapili pagka presidente mibalibad siya ug miingon nga bisan ang Ginoo pa ang mopadagan kaniya dili gyod siya apan sa takulahaw lang midagan siya pagka presidente ug napili nga presidente sa nasud.
Sa Gerry Auxilio Live on Facebook, ang kanhi Presidente nga si Gloria Macapagal Arroyo nga nahimong Speaker of the House miingon nga dili na siya magpapili pagka kongresista apan nagpapili siya ug nahimong Deputy Speaker sa House of Representatives.
Ang mga pulong nga atong gihisgotan dinhi maingon nato nga giabuso sa mga politiko ug sa ilang pagbakwi damay ang Ginoo kay maoy himoong rason nga maoy nagplano.
Hinuon makasabot ta kay kun sayo man god sila nga modeklarar sa ilang intensiyon sa pagpapili sa ilang gusto nga posisyon makapangandam ang ilang kaatbang sa pagpangita og mga isyu nga ilabay ngadto kanila ug sugdan na dayon ang pag guba sa ilang pagkatawo o bansagon.
Kining maong sitwasyon gipamatod-an ni kanhi Bise Presidente Jejomar Binay kinsa sayo nga mideklarar sa iyang kaugalingon nga magpapili pagka presidente sa nasud hinungdan nga sayo pod nga gisugdan sa pag guba ang iyang pagkatawo ug hinay-hinay kining nakapawagtang sa iyang pagkasikat.
Mao ni ang gustong likayan sa mga tang-an nga mga politiko. Wala ko mag-ingon nga dili tang-an si Binay sa politika, nag eksperimento lang siya.