Apil kaha ni sa saad ug pasalig?

Way but-an nga Pilipino ang di bation og iskandalo sa makabungog nga kantidad sa intelligence ug confidential fund nga gigahin alang ni Bise Presidente Sara Duterte ubos sa giproponer nga 2024 national budget.

Gawas sa P500 million nga confidential fund sa Office of the Vice President, duna pay laing P150 milyones nga confidential fund ang bise presidente isip kalihim sa Department of Education (DepEd). Kun atong sumadahon dunay P650 milyones nga kinatibuk-ang confidential fund si Duterte nga mahimo niyang gastohon sunod tuig wa pa ni labot sa regular nga budget sa iyang buhatan.

Ang naka iskandalo niini, gawas nga wala unta magkinahanglan og confidential fund ang DepEd ug ang Office of the Vice President, mao nga mas dako pa ang iyang pahat kay sa Department of National Defense (DND) ug sa National Intelligence Coordinating Agency (NICA) nga maoy mas labaw ng nagkinahanglan.

Sigun sa giproponer nga 2024 national budget, ang DND gihatagan lang og P97 milyones nga intelligence ug confidential funds. Samtang ang NICA duna lay P341.2 million. Unsaon man ang confidential fund sa DepEd ug sa buhatan sa bise presidente?

Ang paggahin og confidential fund ngadto sa mga ahensiya nga wala magkinahanglan usa ka tataw nga ehemplo sa dili husto nga paggamit sa daginuton nga pundo sa gobiyerno.

Ang pagpaugat sa administrasyon taliwa sa tataw nga iskandalo resulta sa dako uyamot nga utang kabubut-on ni Presidente Ferdinand  Bongbong  Marcos, Jr. ngadto ni Duterte.

Kun atong lingi-on ang mga panghitabo sa nag-angat pa ang 2022 elections atong masabtan nganong ingon nalang niini ka espesyal si Duterte.

Utang ni Bongbong ang iyang pwesto kang Sara tungod kay kun nidagan pa ang naulahi sa pagkapresidente di moabot sa Malakanyang si BBM. Kun nahinumdom mo labihan ka inilog sa survey ni Sara niadtong higayona ug makapatingala nganong bisan sa tataw niyang kadaugan misugot man hinuon nga mahimong runningmate ni Bongbong. Unsa man kahay pasalig ni Bongbong niya? Apil kaha ni sa mga saad nganong nisugot siyang magbise presidente inay nga modagan gyud pagkapresidente? Unsa pa man kahay laing saad ug pasalig?