Pagpasar sa Senado sa Maharlika Investment Fund (MIF) bill, bisan sa makiangayong pagsupak sa mga ekonomista ug ilang kaugalingong mga sakop, maoy laing ebidensiya nga nahalin nang institusyon. Ang bantayog sa kaligdong ug kamakinaadmanon sa nangaging mga senador gitumba sa mga taphaw nga nakapuli sa lingkoranan.
Pero unsa may mapaabot gikan sa laos nga mga artista, mapahimuslanong mga negosyante ug oportunistang mga politiko? Nga nidaog sa niaging eleksiyon kay nakasakay sa baha sa fake news. Ug napakyas pagtugkad sa tradisyon sa kaugalingnan sa Senado. Kay pulos nagharab-harab nga makasikit sa luwag.
* * *
Makapahugno ang beteranong mga senador. Nga sa nangaging mga administrasyon nimatuod sa ilang kahinog pagpanday sa makaayo nga mga balaod ug kaisog sa pagbisto sa kinawatay sa mga transaksiyon ug pagbarug batok sa mga pagsuway pagpahimus sa mga magbubuhis.
Karon sila nay lider sa yango. Sa bisan unsang kagaw nga nisud sa bakukang sa mga nagtungkawo sa Malakanyang. Nakalimtan ang mga mithi nga ilang gipakigbisogan. Nahadlok nga mahibilin sa gawas sa kusina. Ug maglaway lang sa pagsabod sa gahom ug kuwarta. Nga mabahin lang sa mga tsuwawap sa gahom.
* * *
Labaw’ng hilas ang mga senador nga nagpaukyab atol sa debate sa MIF. Gidasonan nilang sibaw nga kasuko sa mga sakop sa Social Security System (SSS) ug Government Service Insurance System (GSIS) dihang hilabtan unta ang ilang pundo. Gisunod nilang pasidaan sa mga ekonomista nga ang nasud way sobrang kuwarta ug nalubong sa utang maong di angayng mosugal sa kuwarta para sa mas dinalian nga mga panginahanglan sa edukasyon, healthcare ug infrastructure.
Pero sa botasyon kinadak-an og nganga nga nilamoy sa MIF.
* * *
Karong nakalusot nang MIF sa House of Representatives ug sa Senado, way makapugong sa tinak-opang tigom sa bicameral conference committee pagsukip pagbalik sa tanang kuwestiyonableng orihinal nga mga probisyon nga ila kunohayng gibakwi.
Ug pagsegurong mapatuman ang gituohang tinuod nga tuyo sa MIF: Ang pagbawi sa mga Marcos sa ilegal nilang katigayonan nga nadaog sa gobyerno. Ang kapin tulo ka dekada nga paningkamot pagtultol sa tanan nilang kinawat maanugon lang. Kay dunay gahom ang Maharlika Investment Corporation (MIC) sa pagkuha sa tanang kabtangan nga nasakmit sa Presidential Commission on Good Government (PCGG).
* * *