Maayong Balita
Ang pulong Espiritu nagagikan sa pulong Pneumah ug Ruah mga pulong Griyego ug Hebrew nga dunay emphasis sa breathing kun gininhawa.
Nga sa ato pa ang Espiritu Santo principle of Life sa atong kinabuhi ingon nga simbahan ug ingon nga mga sumusunod ni Kristo Jesus. Niadtong adlaw sa Pentekostes ang usa ka Agricultural Feast sa mga Judio nahitabo ang paggasa sa Espiritu Santo ngadto sa Mahal nga Inahan ug sa mga tinun-an.
Nahatag ang mga karisma ug gasa ngadto sa mga tinun-an. Ang glossolalia kun ang pagsulti sa mga nagkadaiyang matang sa pulong nagpasabot man nga dunay daghang mga gasa apan usa lamang ka Dios ang gigikanan.
Kasinatian
Niadtong mga tuig 1980s nahimong kusog kaayo ang mga Catholic Charismatic Renewal Movements nisiak kini mga nagkadaiyang mga grupo. Ang uban kanila nahisakop na pud sa mga nagkadaiyang mga covenanted groups.
Kining maong Charismatic Groups maoy paagi aron dili mahiadto sa mga protestanteng grupo ang atong kaigsuonang Katoliko. Ang pamaagi sa ilang prayer and worship daw susama gyud sa mga protestante. Usa kini sa mga epekto sa Segundo Vaticano nga Konsilyo.
Lihok
Atong sangpiton ang Balaang Espiritu sa matag higayon nga kita bation og kaluya, kalibog ug mga pagsulay. Sa mga higayon nga mamahimo kitang luya ug bugnaw sa atong pagtuo atong sangpiton ang Espiritu Santo aron kita mamahimong init ug buhi diha sa pagpangalagad sa Ginoo.
Pangamuyo
Umanhi ka O Espiritu Santo, Pun-a sa kalayo sa imong gugma.
Ang mga kasingakasing sa imong mga alagad. Ipadala ang imong Espiritu ug mamugna sila ug bag-ohon mo ang dagway sa yuta. Amen.