Plastik nga pusil-pusil

Gisaksihan ni Presidente Marcos, Jr. ang pagpasundayag sa bag-ong anti-air warfare capability sa Philippine Navy didto sa kadagatan sa San Antonio, Zambales. Matud sa Presidente, padayonon sa iyang administrasyon ang paglig-on sa kapasidad sa atong Armadong Kusog. Gikalipay ug gipasigarbo kini’ng kalamboan sa Philippine Navy bisan kon diyotay ra kaayo kini kon itandi sa kapasidad sa ubang nasud. Nahisama intawon ang atong Philippine Navy sa bata nga naanad na sa kahoy nga pusil-pusil busa labihang lipaya nga napulihan na kini og pusil-pusil nga plastik. Fezteleern!

‘TEMPOLARY’ NGA PLAKA

Taliwala sa nagkadaghan nga reklamo sa mga motorista, miluwat og kamandoan ang LTO nga nagdili sa mga enforcers sa pagkumpiska sa plaka sa sakyanan isip hulip nga silot kon ang tukmang silot sa kasaypanan dili pa mahimong ipatuman. Maayo nga giklaro kini sa LTO. Baligho hunahunaon nga wala pa gani mabuhat ug mahatag sa ahensiya ang mga plaka sa tanan’g rehistrado’ng sakyanan, unya ila pa’ng kumpiskahon ang pipila ka plaka nga ilang nahatag. Labot pa, unsa man sad ang kumpiskahon nga, matud pa sa among drayber, sagad sa mga plaka nga nataud sa sakyanan, mga TEMPOLARY pa man. Shalaan!

HILAW PA ANG DEVOLUTION

Matud ni Presidente Marcos, Jr., kinahanglan nga tumbokon pag-ayo ang mga gimbuhaton nga iya lamang sa kagamhanan’g lokal sa tumong nga magahinan kini sa tukma ug igo’ng pundo aron mapatuman kini. Subay ang pamahayag sa Presidente sa devolution concept nga maoy dugokan sa Local Government Code. Apan sa kahimtang karon, tataw nga gimbuhaton ra ang gi-devolve ngadto sa lokal nga kagamhanan apan walay kauban nga pundo. Nahisama ang national government sa pangulo sa fraternity nga mosugo sa bag-ong recruit pagpalit og beer apan walay gihatag nga kwarta sa iyang gisugo unya mangayo pa gyud og sukli. Pagkatoytoy!

DILI ANGAY MAGUOL

Mipasalig si CCPO Director Col. Ireneo Dalogdog nga madasigon ug taas gihapon ang morale sa kapolisan sa dakbayan sa Sugbo bisan sa kamanduan ni Mayor Michael Rama nga pugngan una ang paghatag sa ilang binulan nga allowance nga tag-5 mil pesos, hangtud nga masuta na ang kahimtang sa kalinaw ug kahapsay sa dakbayan. Matud ni Col. Dalogdog, aduna ma’y sweldo ang kapolisan busa dili sila apektado kon wala pay incentive nga ihatag. Sakto si Col. Dalogdog, dili angay magool ang kapolisan kay gawas sa sweldo, anaa pa ma’y tigpatanto ug mga prendahanan nga kaduolan. Matud pa bitaw, “If God closes doors, He opens PAWNSHOPS”. Madahaaan!

WALA’Y HIGALA SA POLITIKA

Nagtoo si Rep. Gloria Macapagal-Arroyo nga nasaypan sa paghubad ang lintunganay sa iyang mga lihok nga naglaraw siya nga maghimo’g pag-alsa (coup) batok kang Speaker Romualdez aron masakmit niini ang pwesto sa naulahi, hinungdan nga gipalagpot siya isip Deputy Speaker sa Kamara. Mahimong nagsulti siya Rep. Arroyo sa tinuod o mahimo usab nga natiktikan ang iyang laraw. Ning panghitabo sa kongreso, tinuod ang panultihon nga, “Sa politika, walay permanente nga higala, kon dili permanente nga interes lamang.” Muleeeng!