Kinsay nakasapi?

Nabisto nga dugay ra diay nga wa na magdawat og bayad ang dakbayan sa Sugbo sa operasyon sa V-hire terminal diha sa Barangay Kamagayan.

Sigun sa report, niadto pang tuig 2020 katapusang nangolekta ang syudad og bayad sa operasyon sa terminal.

Nahunong ni dihang gihugtan ang pagpatuman sa mga health protocols tungod sa pandemya.

Apan dihang miluag na ang mga lagda ug gibuksan pagbalik ang operasyon sa terminal wala na  magdawat og bayad ang syudad.

Sigun sa mga drayber og V-hire way nausab sa ilang bayranan.

Padayon silang naghatag og P200 nga bayad sa terminal matagbiyahe.

Ang pangutana hain paingon ang ilang bayad? Kinsay nangolekta niini sukad niadtong 2021 hangtud gisirad-an sa syudad ang terminal niadtong miaging semana.

Way makatug-an kinsay nagdawat sa bayad sa terminal. Matud sa mga drayber nga ang nagbantay sa terminal miingon kuno nga sila ray mohatud sa bayad sa city hall. Wala sab mohatag og pangalan kinsay ilang gihatagan sa ilang bayad.

Si City Administrator Collin Rosell miingon way naabot nga bayad sa City Hall sanglit wa nay mga kawani sa city treasurer nga gidistino sa terminal.

Ang pangutana nganong wala man sila modestino nga nahibawo man sila nga nagpadayon ang operasyon niini?

Lisod tuohan nga way kalibutan ang mga opisyal sa syudad. Mimando na hinuon og imbistigasyon ang dakbayan.

Hinaot nga dunay resulta ang imbistigasyon  ug dili mahisama sa daghan na nilang gimandong pakisusi  apan way klarong linugdangan.

Importanteng masayran sa publiko kinsay nagpahimulos sa luna sa syudad isip terminal.

Ug si kinsa ang mga opisyal sa dakbayan nga posibling kakonsabo pagkawat sa angayang kita sa dakbayan gikan sa operasyon sa terminal.