Himoon nga 24/7 ang operasyon sa Cebu City Anti-Mendicancy Board (CCAMB) aron pagtuman sa ultimatum sa mayor nga
nga wala na’y street dwellers inig abot sa Independence Day karong Hunyo. Adunay temporaryong puloy-anan ang ma-rescue
diha haduol sa NOAH Complex sa SRP. Maayo kay dili kini sama sa ordinansa nga gipatuman usab sa dakbayan sa Sugbo nga
nagdili pagpangihi sa publikong lugar. Daghan intawon taga-probinsiya ang madakpan kay nangihi atubangan sa poste sa
kuryente. Naghimo lang og ordinansa apan walay tugbang nga pansayan nga gitukod ang dakybayan sa mga stratehiyang mga
lugar. Fishkots!
Mangandam sa gubat
Nanawagan ang Amerika sa China nga hunongon na sa naulahi ang iyang “mapangahas ug dili-luwas” nga lihok diha sa gi-ilogan
nga South China Sea human sa bag-ong panghitabo diin diriyot magkadasmag ang barko sa coast guard sa matag habig. Dugang
pa sa Amerika, ang bisan unsang atake batok sa armadong kusog sa Pilinas maka-aghat usab sa Amerika pag-responde. Hulga
sa pulong pa lang ang gihimo sa Amerika nga wala pa usab panumbalinga sa China. Apan sayod kita nga ang gubat mahitabo
gayod kon ang pagpakighinabi mapakyas na. Haum alang sa mga Pinoy ang tambag nga, “Sa panahon sa kalinaw, mangandam
na kita sa gubat”. Madahaaan!
Dili sweldo ang makapa-dato
Mipalanog na usab sa ilang demanda ang mga magtutudlo sa Central Visayas kabahin sa pagpa-usbaw sa suholan ug benepisyo
nga ilang gipadayag pinaagi sa usa ka zumba activity. Tinuod nga ang sweldo karon sa ordinaryong mamumuo dili paigo sa
padayon nga pagsaka sa palaliton. Malisod usab sabton ang mga ekonomikanhong rason ngano nga makuli ang kagamhanan
pagpasar og balaodnon nga mopataas sa suholan. Ni’ng kahimtanga, ato na lang lingawon ang atong kaugalingon sa panultihon
nga, “Dili sweldo ang makapadato sa tawo, kon dili ang iyang kinaiya sa pag-gasto.” Muleeeng!
Gitultolan sa iring
Usa ka langgam nga parrot nga gipanag-iya ni Brent Chadwill ang nawala apan nakaplagan ra usab paglabay sa tulo ka adlaw sa
panimalay ni Reed Schweizer didto sa Florida, USA, kinsa mipahibalo gilayon sa tag-iya niini. Nakugang si Schweizer kay
nakasulti man ang parrot. Makapahinumdum sa bata nga gisugo sa iyang inahan paglabay sa ilang iring sungkaban sa layong lugar
aron dili na makabalik. Misanong ang bata sa sugo apan hapon na kini nahiuli busa gipangutana kini sa inahan kon unsay iyang
nadugayan. Mitubag ang bata nga, “Nah, kabalo ka Nay, sa kalayo sa among naabtan, kon wala pa ang iring, dili na unta pud ko
katultol pagpauli.” Pagkatoytoy!
Mismanagement sa NAIA
Mipadayag sa ilang kasuko ug ka-dismaya ang mga senador tungod sa nahitabong power outage sa NAIA atol sa kasaulogan sa
Labor Day nga nakahasol sa daghang mga pasahero. Daw wala makat-on ang mga tigdumala sa airport sa susamang sayop nga
nahitabo niadtong bag-ong tuig. Sa panglantaw sa katawhan, ‘mismanagement’ ang nahitabo sa NAIA. Sa kadismaya nga
gipakita sa mga senador, haum ni’ng kahimtanga ang panahom nga, “Mag-ugtas ang mga politiko sa pagpanaway aron
makurihian ang pagka-bulay-og sa gobyerno..” Fezteleern!