Lugway sa holiday sa mga scammers

Usa sa mga hinungdan ug tingali mabasol sa kakuwang og disiplina sa kadaghanan sa mga Pilipino mao ang haguka nga baruganan sa atong gobyerno pagpatuman sa mga lagda.

Naanad ta sa unya-unya hinungdan nga sa daghang butang kasagaran nato di mokihol ug dili moabot ang deadline---usa sa mga bati nga kinaiya sa kasagaran natong mga Pilipino.

Ug sa daghang higayon gipasumban ug gikonsintir sa atong mga opisyal ug gobiyerno.

Ang labing ulahing ehemplo niini mao ang paglugway sa kagamhanan sa pagpangrehistro sa Subscribers Identity Module o SIM.

Ubos sa SIM Rehistration Act napupos na unta gahapon, Abril 26, ang pagpangrehistro sa SIM.

Sugod unta karong adlawa dili na magamit ang mga SIM nga wala marehistro.

Apan tungod kay dunay mga nanghangyo, apil na ang pipila ka mga politiko, nga lugwayan pa tungod kay daghan pa kuno ang wala makaparehistro hinungdan nga gitugot ni Presidente Bongbong Marcos ang 90 ka adlaw nga lugway.

Nagpasabot sab ni og 90 ka adlaw nga holiday sa mga kriminal nga migamit og di rehistrado nga SIM sa ilang illegal nga           kalihukan.

Sulod sa maong gidugayon posibling gatusan o liboan pa ka mga inosenting Pilipino ang mabiktima sa mga mangingilad nga di madakpan sa mga awtoridad kay di ma-trace ang SIM nga ilang gigamit.

Wala na gyud unta kinahanglana nga  lugwayan ang SIM registration.

Igo na ang higayon nga gihatag aron makaparehistro.

Gawas niadtong wa gyuy valid ID nga magamit, kun wala ka karehistro sa imong SIM bisan kumpleto ka sa ID nagpa-ila ni sa imong ka iresponsable.

Kun ang rason sa wala makaparehistro mao nga wa silay valid ID, unsay kasiguroan nga makakuha sila og ID sud sa 90 ka adlaw nga lugway?

Mas nakapabor ang mga scammers niining maong sitwasyon kay sa mga responsable nga mga Pilipino.