Sayo sa buntag nimata ko aron makapangandam padulong sa Cancalape. Kining maong kapilya maoy pinakalayo nga kapilya sa akong Parokya.
Salamat ni Konsehal Alex Lobino nga maoy nangunay pag drive sa iyang sakyanan. Kuyog usab nako niadtong tungora ang mga sacristan ning akong Parokya.
Adlaw kadtong Sabado petsa 15 ning bulan sa Abril ilang patron mao man si San Vicente Ferrer.
Tungod sa distansiya ug sa kalisod sa dalan kinahanglang maghinay lang gyud sa paglakaw. Dul-an duha ka oras ang paingon adto ug laing duha ang paingon balik sa parokya.
Adunay pipila ka mga punto sa pamalandong:
1. Dili tanang panaw sayon ug dali. Dunay panaw nga lisud ug dugay. Lisud tungod kay maoy nahatag sa kahigayonan.
Dugay tungod kay usa man ka purification experience ang matag lakang.
2. Pailob ang kinahanglanon aron makaabot sa padulngan.
3. Anaa ang kakapoy mao nga mopahuway ug mamalandong. Dili tanang kakapoy hinungdan sa pagsibog. Mopahuway lang apan mopadayon pohon.
4. Mamahimong kulbahinam ang panaw labina kun aduna kay kuyog.
Ang panaw kinahanglang sabton ingon nga katilingbanon akto kang kansang tumong mao man ang Dios. Sa Dios kita gikan ug angayan lamang nga sa Dios kita mopauli.
5. Kuyog sa maong malisud nga pagbaktas mao man ang pagsinati sa kaanindot sa kinaiyahan.
Taliwala sa naglagiting kainit sa adlaw dako nakong kalipay nga naminaw sa makahupay nga tingog sa busay.
Oo dinhi anaa miy daghang mga busay. Nahupay ang akong galamhan.
Kini ug ubang pang mga yanong nakat-onan dako og kahimoan aron mas masabtan nato ang atong kinabuhi nga ang kinabuhi usa diay ka panaw diin gawas sa Dios kita ang mohukom kanus-a kita mopahulay ug mopadayon.